Падзеі

Гомель і Арол падпісалі пагадненне аб пабрацімстве

Фота з архiва

2 ліпеня, Гомель /Кар. БЕЛТА/. Пагадненне аб устанаўленні пабрацімскіх адносін паміж беларускім Гомелем і расійскім Арлом падпісана 2 ліпеня ў горадзе над Сожам, паведамляе карэспандэнт БЕЛТА.

Подпісы пад дакументам паставілі старшыня Гомельскага гарвыканкама Уладзімір Прывалаў і мэр Арла Юрый Парахін. "Дзякуючы адзінству і захаванню гістарычнай памяці мы будзем процістаяць выклікам часу, захаваем суверэнітэт і незалежнасць", - падкрэсліў Уладзімір Прывалаў.

"Выконваючы задачы, пастаўленыя нашымі лідарамі (дзяржаў. - Заўвага БЕЛТА) па інтэграцыі эканомік, мы рады падпісаць пагадненне з Гомелем - другім па значнасці горадам Беларусі, які мае глыбокую гісторыю і трывалыя эканамічныя сувязі. Нашым прадпрыемствам будзе цікава пастаўляць прадукцыю на рынак Беларусі, у тым ліку і ў Гомель", - адзначыў Юрый Парахін.

Госці з Расійскай Федэрацыі прыехалі павіншаваць гамяльчан з Днём Незалежнасці Беларусі і 80-годдзем вызвалення краіны ад нямецка-фашысцкіх захопнікаў і прынялі ўдзел ва ўрачыстым мітынгу на Алеі Герояў. Мэр расійскага горада падкрэсліў, што менавіта на беларускай зямлі пачынаецца гераічная гісторыя Вялікай Айчыннай вайны. Юрый Парахін успомніў словы Якава Кедмі, якія, паводле яго пераканання, паказалі агульную ментальнасць беларусаў і расіян, іх адносіны да гісторыі, да краін. Гэта словы аб тым, што не было ні ў адной арміі свету Брэсцкай крэпасці, не было Сталінграда ні ў каго. Словы "Я паміраю, але не здаюся" крывёй напісаны толькі на рускай мове. Ніхто ні на адной іншай мове ніколі гэтага не пісаў.

"Мне здаецца, варта дабавіць, што не было ні ў каго Гомельскага плацдарма, не было ні ў каго Арлоўска-Курскай дугі. А словы, напісаныя на сцяне Брэсцкай крэпасці, сталі дэвізам для многіх і многіх пакаленняў", - дадаў Юрый Парахін. Ён звярнуўся і да выказвання Прэзідэнта Беларусі: "Як Расія для нас, так і Беларусь для Расіі з'яўляецца анёлам-ахоўнікам". "У самыя складаныя часы мы заўсёды падставім адзін аднаму плячо. Сённяшняе пагадненне якраз дэманструе гэта - калі Гомель і Арол падстаўляюць адзін аднаму плячо для барацьбы з санкцыйнай палітыкай, якую праводзіць Захад у адносінах да нашых краін", - дапоўніў кіраўнік расійскага горада.

версія для друку

зрабіць стартавай

дабавіць у выбранае