Падзеі

"Гэта вышэйшы цынізм". Прэзідыум Савета Рэспублікі прыняў заяву ў сувязі з рэзалюцыяй ПАСЕ

Фота з архiва

5 мая, Мінск /Кар. БЕЛТА/. Прэзідыум Савета Рэспублікі Нацыянальнага сходу прыняў заяву ў сувязі з прыняццем Парламенцкай асамблеяй Савета Еўропы рэзалюцыі адносна перамяшчэння ўкраінскіх дзяцей. Аб гэтым БЕЛТА паведамілі ў прэс-службе верхняй палаты парламента.

"Прэзідыум Савета Рэспублікі Нацыянальнага сходу Рэспублікі Беларусь абураны прынятай Парламенцкай асамблеяй Савета Еўропы (ПАСЕ) рэзалюцыяй "Дэпартацыя і насільныя перамяшчэнні ўкраінскіх дзяцей і іншых цывільных асоб у Расійскую Федэрацыю або на часова акупіраваныя ўкраінскія тэрыторыі: стварэнне ўмоў для іх бяспечнага вяртання, спыненне гэтых злачынстваў і пакаранне вінаватых" і згадваннем у гэтым дакуменце Рэспублікі Беларусь, - гаворыцца ў заяве. - Гэта яшчэ адзін яскравы прыклад таго, як еўрапейскія палітыкі і парламентарыі сталі заложнікамі ўласнай гульні ў цэнзуру і брудную прапаганду ў адносінах да падзей ва Украіне. Вышэйшым цынізмам з'яўляецца скажэнне Парламенцкай асамблеяй Савета Еўропы гуманітарнай місіі па выратаванні цывільнага насельніцтва, уключаючы дзяцей і жанчын".

Пры гэтым, насуперак развазе і сумленню, замоўчваюцца шматлікія факты знішчэння мірных людзей у час нявыбарачных абстрэлаў заходняй зброяй жылых кварталаў у Данецку і Луганску. "Менавіта гэта і ёсць самы сапраўдны генацыд, праяўленне ў дзеянні безумоўнага выканання ўкраінскімі ўладамі ўстановак сваіх заходніх куратараў - весці вайну ва Украіне да апошняга ўкраінца, - адзначаецца ў дакуменце. - Чарговы раз падкрэсліваем: Рэспубліка Беларусь - міралюбная дэмакратычная сацыяльная прававая дзяржава, для якой чалавек, яго правы і свабоды з'яўляюцца вышэйшай каштоўнасцю і мэтай. Наша краіна добрасумленна выконвае міжнародныя дагаворы ў галіне правоў чалавека, уключаючы Канвенцыю аб правах дзіцяці. У Беларусі атрымалі другі дом тысячы ўкраінскіх грамадзян, вымушаных уцякаць ад баявых дзеянняў, хаосу і разрухі. Сёння яны - нашы людзі, беларускія ўкраінцы, якія атрымліваюць неабходную дзяржаўную абарону і падтрымку. Украінскія дзеці рэгулярна праходзяць рэабілітацыю ў аздараўленчых лагерах Беларусі, дзякуючы чаму могуць адчуць шчаслівае і бесклапотнае дзяцінства. Упэўнены ў тым, што не чыноўнікам з Савета Еўропы, якія адкрыта падтрымліваюць канфлікт ва Украіне, вызначаць, якімі павінны быць адносіны беларускага і ўкраінскага народаў, як нам жыць".

Прэзідыум Савета Рэспублікі рашуча асуджае бесперапынныя спробы ўмяшання ПАСЕ ва ўнутраныя справы Беларусі і іншых суверэнных дзяржаў, канфрантацыйныя падыходы і недружалюбную рыторыку. "Мы чарговы раз заклікаем да развіцця канструктыўнага міжпарламенцкага супрацоўніцтва і выбудоўвання цывілізаванага дыялогу паміж краінамі і народамі ва ўсім свеце. Беларусы - спагадлівы народ, які ўсю сваю гісторыю працягваў і працягвае руку дапамогі ўсім тым, хто больш за ўсё ў ёй мае патрэбу. Гэта нацыянальная рыса па праву з'яўляецца нашай гордасцю", - падкрэсліваецца ў заяве.

версія для друку

зрабіць стартавай

дабавіць у выбранае