Падзеі
"Гэта людзі выключнай працавітасці і адказнасці". Прэм'ер Беларусі ўручыў дзяржузнагароды
27 снежня, Мінск /Кар. БЕЛТА/. Прэм'ер-міністр Раман Галоўчанка ўручыў дзяржаўныя ўзнагароды прадстаўнікам розных сфер, перадае карэспандэнт БЕЛТА.
"Простым вокам відаць, што ў гэтай зале пануе асаблівая, святочная атмасфера. Прыгажуня-ёлка нагадвае, што набліжаюцца вельмі любімыя ўсімі навагоднія святы. Але сёння гэта не галоўная падстава. А галоўная - па даручэнні Прэзідэнта Рэспублікі Беларусь Аляксандра Рыгоравіча Лукашэнкі будуць уручаны дзяржаўныя ўзнагароды людзям, якія заслугоўваюць таго, каб пра іх даведалася ўся краіна", - сказаў Раман Галоўчанка.
Паводле яго слоў, прысутныя тут - прадстаўнікі абсалютна розных прафесій з розных куткоў Беларусі. "Гэта людзі выключнай працавітасці і адказнасці. Менавіта гэта, на мой погляд, іх і аб'ядноўвае. Стваральная праца ў аснове развіцця любога грамадства. І наша, вядома ж, не выключэнне", - адзначыў прэм'ер-міністр.
"Адыходзячы год быў няпростым. Па-іншаму і быць не магло: вы бачыце, якія турбулентныя працэсы адбываюцца як па перыметры граніц нашай дзяржавы, так і ў цэлым у свеце. Але мы вытрымалі гэту праверку на трываласць з годнасцю. Тэмпы эканамічнага росту ў нас складваюцца вышэйшыя за сусветныя. Прагназуем, што па выніках года тэмп росту ВУП складзе 103,8 працэнта. Гэта нядрэнныя вынікі з улікам таго эканамічнага націску, які на нас аказваецца, і гэта адпавядае задачы, пастаўленай кіраўніком дзяржавы на 2023 год", - паведаміў ён.
Кіраўнік урада адзначыў, што актывізуецца інвестыцыйная дзейнасць. "Гэта ўкладанні фінансавых сродкаў у новыя аб'екты, вытворчасці, тэхналогіі. За 11 месяцаў бягучага года аб'ём інвестыцый у асноўны капітал вырас на 14 працэнтаў да аналагічнага перыяду мінулага года. У знешнім гандлі захоўваецца збалансаванасць. Дадатнае сальда - каля $700 млн. Мы прадаём на гэту суму больш, чым імпартуем", - канстатаваў Раман Галоўчанка. Паводле яго слоў, забяспечаны рост дабрабыту насельніцтва, расце намінальная налічаная сярэднямесячная заработная плата.
"Словы падзякі адрасуем работнікам нафтахімічнай галіны, якіх асабліва шмат у гэтай зале. Бягучы год быў няпросты для галіны. Завершана шматгадовая праграма мадэрнізацыі двух нафтаперапрацоўчых заводаў, што дало магчымасць істотна паглыбіць перапрацоўку нафты і павысіць адбор светлых нафтапрадуктаў. На бліжэйшую перспектыву перад канцэрнам "Белнафтахім" стаяць не менш важныя задачы: ажыццявіць вялікую мадэрнізацыю ААТ "Гродна Азот", стварыць новыя вытворчасці ў ААТ "Магілёўхімвалакно" і на іншых прадпрыемствах", - дадаў прэм'ер-міністр.
Раман Галоўчанка звярнуўся і да прысутных у зале работнікаў лясной галіны. "Прайшло паўтара года з таго часу, як галіна сутыкнулася з беспрэцэдэнтнымі санкцыямі з боку заходніх краін, але дзякуючы аператыўным і эфектыўным кіраўніцкім рашэнням на месцах удалося не толькі захаваць прадпрыемствы і працоўныя калектывы, але і забяспечыць выкананне ўсіх даведзеных галіне паказчыкаў сацыяльна-эканамічнага развіцця", - падкрэсліў ён.
"Важна адзначыць дасягненні прамыслоўцаў. Прадстаўнікі значных беларускіх прадпрыемстваў прысутнічаюць у гэтай зале. І ў мінулым, і бягучым годзе прадпрыемствы Міністэрства прамысловасці спрацавалі вельмі нядрэнна. Індэкс аб'ёму вытворчасці прамысловай прадукцыі складзе па выніках года 112,1 працэнта. Задача стаіць не страціць дасягнутага тэмпу і ў наступным годзе", - канстатаваў прэм'ер-міністр.
Высокімі ўзнагародамі адзначаны работнікі падатковых органаў. "Каля 70 працэнтаў усіх даходаў бюджэту фарміруецца за кошт плацяжоў, кантралюемых падатковымі органамі, з якіх потым плацяцца заработная плата, пенсіі, іншыя выплаты, фінансуюцца важнейшыя для краіны праекты ў розных сферах", - дадаў ён.
Сярод прысутных і тыя, хто ўдастоены медаля Францыска Скарыны. "Гэта дзеячы культуры, навукі і адукацыі, якія сваім асабістым укладам умацоўваюць інтэлектуальны патэнцыял і культурную спадчыну беларускага народа. Вы стаіце ў авангардзе барацьбы за розумы і душы, асабліва нашых маладых грамадзян, адыгрываеце неацэнную ролю ў выхаванні моцных асоб з высокімі маральнымі якасцямі і моцнымі каштоўнаснымі арыенцірамі", - падкрэсліў Раман Галоўчанка.
Сёння дзяржаўныя ўзнагароды атрымалі больш як 50 чалавек.
версія для друку
зрабіць стартавай
дабавіць у выбранае