Падзеі

Галоўчанка пракаменціраваў магчымасць перадачы прэзідэнцкіх паўнамоцтваў Савету бяспекі

4 мая, Мінск /Кар. БЕЛТА/. Прэм'ер-міністр Раман Галоўчанка пракаменціраваў сёння журналістам магчымасць перадачы прэзідэнцкіх паўнамоцтваў Савету бяспекі, што плануецца замацаваць у асобным дэкрэце кіраўніка дзяржавы, перадае карэспандэнт БЕЛТА.

Раман Галоўчанка расказаў, што ў складзе членаў Савета бяспекі ўдзельнічаў у падрыхтоўцы прапаноў па анансаваным дэкрэце. "Якая будзе канчатковая версія рэдакцыі дэкрэта, пакуль не ведаю. Якое Прэзідэнт прыме рашэнне, такі ён і будзе. А рашэнне трэба прымаць, таму што дэкрэт нараджаецца не на пустым месцы. Мы ўсе ведаем, што адбываецца вакол нашай краіны, якія мэты ставяць непрыяцелі нашай дзяржавы - яны выходзяць за рамкі разумення маральных каштоўнасцей. Таму краіна павінна быць гатова да ўсяго, да любога развіцця сітуацыі. І Прэзідэнт як кіраўнік дзяржавы, галоўнакамандуючы цудоўна гэта разумее", - адзначыў прэм'ер-міністр.
"Мы павінны быць гатовы да любога развіцця падзей, у тым ліку і па тых падставах, якія не закладзены ў дзеючай рэдакцыі Канстытуцыі: гэта магчымасць фізічнага ўстаранення кіраўніцтва краіны", - яшчэ раз падкрэсліў кіраўнік урада.

Паводле слоў Рамана Галоўчанкі, у праекце дэкрэта вызначана, як будзе функцыянаваць дзяржава ў выпадку пазаштатнай сітуацыі, каб не дапусціць страты кіруемасці краінай і мабілізаваць сілы на захаванне спакою і бяспекі грамадзян.

Каменціруючы інфармацыю ў інтэрнэце нібыта і аб тым, што прэм'ер-міністр павінен затаіць асабістую крыўду на рашэнне кіраўніка дзяржавы перадаць свае паўнамоцтвы калектыўнаму органу, Раман Галоўчанка заявіў, што такія разважанні недарэчныя. "Якія крыўды? Я такая ж службовая асоба, як і многія іншыя. Працую ў сферы, якая мне падабаецца, займаюся эканомікай, дабрабытам грамадзян. Таму загадваць, што будзе потым, - гэта, напэўна, не мая доля. І я спадзяюся і ўпэўнены, што гэты дэкрэт не будзе актываваны. Але, яшчэ раз гавару, гэта той варыянт, які Прэзідэнт змадэляваў на выпадак, калі ўсё ж такі складзецца такая пазаштатная сітуацыя. Галоўнае, аб чым павінен думаць, на мой погляд, кіраўнік дзяржавы - як ажыццявіць бяспеку краіны. Менавіта на гэту мэту накіраваны дэкрэт", - звярнуў увагу кіраўнік урада.

Раман Галоўчанка падкрэсліў, што ўсё кіраўніцтва краіны нясе калектыўную адказнасць за сучаснае і будучае дзяржавы. "Мы дзейнічаем у рамках сваіх паўнамоцтваў. Але калі складзецца пагражальная для нашай краіны сітуацыя, то мы дакладна гэтак жа, калектыўна і маналітна, будзем выконваць нашы абавязкі", - запэўніў ён.

Як паведамлялася, у красавіку Прэзідэнт Беларусі Аляксандр Лукашэнка заявіў, што плануе падпісаць дэкрэт аб пераходзе Савету бяспекі прэзідэнцкіх паўнамоцтваў у выпадку, калі ў краіне ўзнікне такая неабходнасць.

Размаўляючы з журналістамі ў час наведвання Нараўлянскага раёна, Аляксандр Лукашэнка растлумачыў, што анансуемыя ім рашэнні будуць датычыцца выключна ўнутранай сітуацыі ў краіне і адкажуць на пытанне: што калі апанентам улады ўдасца замах на Прэзідэнта?

"Скажыце, калі заўтра няма Прэзідэнта, вы гарантуеце, што ўсё будзе нармальна? Не. Таму на гэты выпадак я падпішу ў бліжэйшыя дні дэкрэт, як будзе выбудавана ўлада ў Беларусі. Прэзідэнта застрэлілі - на заўтра Савет бяспекі будзе надзелены паўнамоцтвамі. Трэба ўводзіць надзвычайнае становішча імгненна, аж да ваеннага, калі нехта на граніцы шавяльнецца. І Савет бяспекі павінен прымаць рашэнне, - расказаў Аляксандр Лукашэнка. - Таму я гаварыў, што падпішу гэты дэкрэт і вызначу, хто будзе кіраваць краінай "калі раптам".

Пры гэтым кіраўнік дзяржавы адзначыў, што такая неабходнасць наўрад ці настане, але губляць пільнасць нельга. "Я павінен прадугледзець усё. Таму будзе падпісаны гэты дэкрэт. У нас будзе фактычна калектыўны Прэзідэнт у выглядзе Савета бяспекі. Так, старшыня будзе: калі няма Прэзідэнта, выконвае абавязкі прэм'ер. Ён будзе старшынстваваць, але ўсе рашэнні будуць прымацца тайным галасаваннем, каб не было націску. Калі будуць прэзідэнцкія выбары назначаны, уводзіць/не ўводзіць надзвычайнае становішча, як дзейнічаць і гэтак далей - вось цывільныя і ваенныя ў Савеце бяспекі вырашаць", - падкрэсліў беларускі лідар.

версія для друку

зрабіць стартавай

дабавіць у выбранае