Падзеі

Галоўчанка накіраваўся з рабочым візітам у Алматы для ўдзелу ў пасяджэнні Еўразійскага міжурадавага савета

Фота з архiва

1 лютага, Мінск /Кар. БЕЛТА/. Прэм’ер-міністр Беларусі Раман Галоўчанка накіраваўся з рабочым візітам у Алматы (Казахстан), перадае карэспандэнт БЕЛТА.

Кіраўнік беларускага ўрада вылецеў з Астрахані, дзе правёў перагаворы з губернатарам Астраханскай вобласці Ігарам Бабушкіным, бакі абмеркавалі перспектывы супрацоўніцтва. Таксама ў праграме візіту было наведванне прадпрыемстваў ТАА ВКФ "Дзюна-АСТ", ТАА "БТ СВАП", ТАА "Гекса-Лотас".

У Алматы Раман Галоўчанка прыме ўдзел у пасяджэнні Еўразійскага міжурадавага савета. Таксама чакаецца, што кіраўнік беларускага ўрада наведае лічбавы форум Digital Almaty 2024.

У парадку дня пасяджэння міжурадавага савета - макраэканамічная сітуацыя ў краінах Еўразійскага эканамічнага саюза і прапановы па забеспячэнні ўстойлівага эканамічнага развіцця, бягучы стан і перспектывы развіцця інтэграванай інфармацыйнай сістэмы ЕАЭС, ход рэалізацыі дарожнай карты па стварэнні спрыяльных умоў для развіцця электроннага гандлю ў саюзе, унясенне змяненняў у пералік прыярытэтных інтэграцыйных інфраструктурных праектаў у сферы транспарту. Сярод іншых пытанняў - рэалізацыя сумеснага праекта па ажыццяўленні паскораных чыгуначных і мультымадальных перавозак сельскагаспадарчай прадукцыі і прадуктаў харчавання "Еўразійскі аграэкспрэс".

Цэнтральнай тэмай форуму Digital Almaty 2024 стане "Індустрыя Х: лічбавая эвалюцыя будучыні". У гэтым годзе на форуме прадугледжана правядзенне шырокай дзелавой праграмы, якая раскрые тэмы лічбавай трансфармацыі ў прамысловасці і інавацыйных рашэнняў у сферах GovTech, "індустрыя 4.0", ESG, Smart City і іншых.

версія для друку

зрабіць стартавай

дабавіць у выбранае