Падзеі

ЕС не будзе замарожваць для Беларусі кошт "шэнгена" да ўступлення ў сілу візавага пагаднення

23 студзеня, Мінск /Кар. БЕЛТА/. Еўрасаюз не будзе замарожваць для Беларусі кошт шэнгенскіх віз на цяперашнім узроўні ў памеры 60 еўра да ўступлення ў сілу двухбаковага візавага пагаднення. Аб гэтым БЕЛТА паведамілі ў прадстаўніцтве ЕС у Беларусі.

"Праз дзесяць дзён, 2 лютага 2020 года, уступіць у сілу перагледжаны Візавы кодэкс ЕС, які акрамя іншых змяненняў прадугледжвае павелічэнне візавага збору для грамадзян усіх краін. Для Беларусі такое павелічэнне будзе часовым, толькі да ўступлення ў сілу Пагаднення аб спрашчэнні візавага рэжыму паміж ЕС і Беларуссю, у адпаведнасці з якім візавы збор аўтаматычна і назаўсёды знізіцца з 80 да 35 еўра для грамадзян Беларусі. Прымаючы пад увагу абмежаванні па часе і працэдурныя патрабаванні, павышэнне шэнгенскага візавага збору з 2 лютага 2020 года адмяніць (замарозіць) для грамадзян Беларусі немагчыма", - заявілі ў прадстаўніцтве.

Як паведамлялася БЕЛТА, візавае пагадненне Беларусь і Еўрапейскі саюз падпісалі 8 студзеня. Цырымонія адбылася ў Бруселі. Дакумент прадугледжвае ўзаемнае аблягчэнне візавых працэдур для шырокай катэгорыі грамадзян і зніжэнне збору. Пры гэтым будзе забяспечана права грамадзян звяртацца за атрыманнем віз як у пасольствы еўрапейскіх краін, так і ў візавыя цэнтры. Кошт "шэнгена" для беларусаў знізіцца да 35 еўра, а рашэнне аб выдачы візы будзе прымацца ў тэрмін да 10 дзён (у выпадку дадатковай праверкі тэрмін можа павялічыцца да 30 дзён). Многія катэгорыі грамадзян у залежнасці ад мэты паездкі змогуць звяртацца за візай без выплаты збору і атрымліваць шматразовыя візы з больш доўгім тэрмінам дзеяння ў спрошчаным парадку.

Беларуская віза для грамадзян ЕС таксама патаннее да 35 еўра. Акрамя таго, будзе павялічаны пералік падстаў для выдачы бясплатных віз у некамерцыйных мэтах. Тэрмін знаходжання замежных грамадзян у Беларусі павялічыцца ў два разы: з 90 дзён за год (цяпер) да 180.

Пасля падпісання дакументы павінны быць ратыфікаваны Нацыянальным сходам Беларусі і адобраны Еўрапейскім парламентам. Пачнуць яны дзейнічаць у першы дзень другога месяца пасля даты паведамлення бакамі адзін аднаму аб завяршэнні працэдур ратыфікацыі. Чакаецца, што гэта адбудзецца ў чэрвені. Беларускія парламентарыі плануюць ратыфікаваць пагадненне на вясенняй сесіі ў пачатку красавіка.

версія для друку

зрабіць стартавай

дабавіць у выбранае