Падзеі

ДМК: заходнія суседзі наўмысна не ідуць на кантакт для вырашэння сітуацыі з чэргамі на граніцы

Фота з архiва

20 верасня, Мінск /Кар. БЕЛТА/. Заходнія суседзі наўмысна не ідуць на кантакт для вырашэння сітуацыі з чэргамі на граніцы. Аб гэтым заявіў старшыня Дзяржаўнага мытнага камітэта Уладзімір Арлоўскі ў інтэрв'ю карэспандэнту БЕЛТА.

Сёння на беларускай граніцы функцыянуюць толькі пяць аўтадарожных пунктаў пропуску з 26: па два на польскім і літоўскім напрамках і адзін - на латвійскім. "Рашэнні краін ЕС з закрыццём пунктаў пропуску і зніжэннем аб'ёмаў пропуску транспартных сродкаў у дзеючых - гэта чыста палітычны крок, які шкодзіць і эканоміцы, і стасункам людзей. Беларускі бок робіць усё магчымае, каб працэс перасячэння граніцы быў менш цяжкім. Але ўсе разумеюць, што эфект будзе толькі ў выпадку сінхранізаванай работы з абодвух бакоў граніцы. Гэтага да цяперашняга часу не атрымліваецца, нягледзячы на нашы ўсялякія спробы вырашэння сітуацыі. Мы неаднаразова звярталіся ў літоўскую і польскую мытныя службы аб неабходнасці выканання дамоўленасцей па прыёме транспартных сродкаў, прапаноўвалася правесці двухбаковыя сустрэчы па адкрыцці закрытых пунктаў пропуску. Безумоўна, пагаршае сітуацыю функцыянаванне толькі пяці пунктаў пропуску", - сказаў Уладзімір Арлоўскі.

"Разумеючы той факт, што сумежны бок наўмысна не ідзе на кантакт для вырашэння сітуацыі з чэргамі, мы актыўна развіваем зоны чакання, каб стварыць умовы для чакання на нашым баку. Сёння такія зоны функцыянуюць перад усімі адкрытымі для руху пунктамі пропуску. Цяпер асноўныя намаганні на пашырэнні такіх пляцовак або будаўніцтве дадатковых перад пунктамі пропуску "Брэст", "Казловічы", "Каменны Лог", "Грыгароўшчына". Але на разважлівасць краін-суседак мы ўсё ж спадзяёмся. Мытныя органы, як і краіна ў цэлым, гатовы да канструктыўнага дыялогу і прыняцця сумесных абдуманых і правільных рашэнняў", - падкрэсліў старшыня ДМК.

версія для друку

зрабіць стартавай

дабавіць у выбранае