Падзеі

Бельская: Беларусь не будзе мірыцца з тым, што тэма правоў чалавека выкарыстоўваецца для аказання націску і санкцый

Фота з архiва

21 чэрвеня, Мінск /Кар. БЕЛТА/. У Жэневе 20 чэрвеня пачала работу 53-я сесія Савета ААН па правах чалавека, якая прадоўжыцца амаль месяц. Аб гэтым карэспандэнту БЕЛТА расказалі ў Пастаянным прадстаўніцтве Рэспублікі Беларусь пры аддзяленні ААН і іншых міжнародных арганізацыях у Жэневе.

У першы дзень работы сесіі прайшло інтэрактыўнае абмеркаванне штогадовага даклада вярхоўнага камісара ААН па правах чалавека. У дыскусіі ўдзельнічалі больш за 120 дзяржаў.

Пастаянны прадстаўнік Беларусі Ларыса Бельская ў сваім выступленні адзначыла: "Прынцып суверэннай роўнасці ўсіх дзяржаў-членаў - аснова дзейнасці ААН ва ўсіх галінах, уключаючы правы чалавека, гэтак жа як і прынцып неўмяшання ў кампетэнцыю дзяржавы, якая нясе асноўную адказнасць па ажыццяўленні правоў чалавека. Калі ўсе партнёры па праваахоўнай сістэме будуць дзейнічаць на гэтых прынцыпах, не прыпісваючы сабе квазісудовыя функцыі, тады мы зможам гаварыць аб рэальным супрацоўніцтве па правах чалавека".

"На жаль, сёння СПЧ і многія праваахоўныя структуры - гэта інструмент вялікай палітыкі, - канстатавала дыпламат. - Дамінуючая ў ААН праваахоўная дактрына часта блакіруе альтэрнатыўныя меркаванні, ігнаруе нацыянальную спецыфіку, культурныя і рэлігійныя асаблівасці незаходніх дзяржаў. Савету і УВКПЧ неабходна спыніць націск праз ангажыраваныя краінавыя мандаты на маю Беларусь, Расію, Сірыю, Нікарагуа, Іран і шэраг іншых дзяржаў, спыніць грубыя спробы ўмяшання ва ўнутраныя справы Кітая пад маркай правоў чалавека ў Сіньцзяне".

Ларыса Бельская заявіла: "Беларусь не будзе мірыцца з тым, што тэма правоў чалавека выкарыстоўваецца для абслугоўвання палітыкі націску і санкцый. Немагчыма супрацоўнічаць з механізмамі, навязанымі супраць волі суверэннай дзяржавы. Мы былі і застаёмся адкрытымі да ўзаемадзеяння з УВКПЧ на аснове нашых нацыянальных інтарэсаў".

Беларускі бок лічыць, што УВКПЧ патрэбны не дадатковыя рэсурсы, а адмова ад палітызацыі, непрадузятасць і актывізацыя работы з дзяржавамі на аснове прыярытэтаў, якія вызначаюцца ўрадамі.

версія для друку

зрабіць стартавай

дабавіць у выбранае