Падзеі

11 кастрычніка, Мінск /Кар. БЕЛТА/. Старшыня Пастаяннай камісіі Палаты прадстаўнікоў Нацыянальнага сходу Беларусі па міжнародных справах Валерый Варанецкі 10 кастрычніка правёў сустрэчу з пасламі па асаблівых даручэннях краін - членаў Еўрасаюза па справах "Усходняга партнёрства", паведамілі БЕЛТА ў прэс-службе Палаты прадстаўнікоў.

Сустрэча адбылася па ініцыятыве паслоў па асаблівых даручэннях у ходзе іх візіту ў Беларусь для правядзення кансультацый з беларускім бокам аб падрыхтоўцы саміту "Усходняга партнёрства" ў Бруселі (Бельгія) 24 лістапада 2017 года і выпрацоўцы яго падагульняючых дакументаў.

У ходзе сустрэчы бакі абмеркавалі стан і перспектывы развіцця супрацоўніцтва Беларусі з Еўрапейскім саюзам, удзяліўшы асаблівую ўвагу праблемным пытанням узаемадзеяння ў рамках "Усходняга партнёрства". Беларускі бок выказаўся за прагматызацыю супрацоўніцтва і яго напаўненне канкрэтнымі ўзаемавыгаднымі праектамі ў інтарэсах кансалідацыі, павышэння канкурэнтаздольнасці і бяспекі Еўропы.

У склад дэлегацыі ЕС уваходзяць паслы, якія курыруюць праблематыку "Усходняга партнёрства", з Польшчы Ян Хофмакль, Швецыі Анна Вестэрхольм і Нідэрландаў Адрыяан Палм. З беларускага боку ў сустрэчы таксама прынялі ўдзел намеснікі старшыні Пастаяннай камісіі Палаты прадстаўнікоў па міжнародных справах Іван Корж, Вольга Папко і Дзмітрый Шаўцоў.