Падзеі

Беларуская дэлегацыя на чале з Алейнікам прыбыла ў ПАР на саміт БРІКС

Фота з архiва

22 жніўня, Мінск /Кар. БЕЛТА/. Беларуская дэлегацыя на чале з міністрам замежных спраў Сяргеем Алейнікам прыбыла ў ПАР для ўдзелу ў мерапрыемствах XV саміту БРІКС. Аб гэтым БЕЛТА паведамілі ў прэс-службе МЗС.

Беларусь на форуме такога ўзроўню будзе ўпершыню. На долю БРІКС цяпер прыпадае 42 працэнты насельніцтва планеты і 31,5 працэнта сусветнага ВУП (а гэта вышэй за паказчык краін G7, ВУП якіх складае 30,7 працэнта сусветнага), каля 20 працэнтаў глабальнага гандлю і 25 працэнтаў прамых інвестыцый.

"Такі значны патэнцыял БРІКС стварае неабходныя перадумовы для выпрацоўкі і прыняцця эфектыўных рашэнняў на глабальныя выклікі, з якімі сёння сутыкаецца міжнародная супольнасць. БРІКС ужо ўяўляе сабой самадастатковы і моцны клуб самастойных ігракоў, якія праводзяць незалежную палітыку, з агульнай прыхільнасцю да каштоўнасцей раўнапраўнага дыялогу і супрацоўніцтва", - адзначылі ў МЗС.

Аб планах беларускай дэлегацыі на чале з Сяргеем Алейнікам прыняць удзел у саміце БРІКС у Паўднёва-Афрыканскай Рэспубліцы БЕЛТА паведамляла раней са спасылкай на прэс-сакратара Міністэрства замежных спраў Анатоля Глаза.

"У нас ёсць адпаведнае запрашэнне, і наша дэлегацыя абавязкова плануе там быць. Нам блізкая і зразумелая асноўная тэма маючай адбыцца сустрэчы на вышэйшым узроўні, яна гучыць як "БРІКС і Афрыка: партнёрства ў інтарэсах сумеснага паскоранага росту, устойлівага развіцця і інклюзіўнай шматбаковасці". Таму Беларусь упершыню прыме ўдзел у мерапрыемствах названага саміту", - адзначыў прадстаўнік МЗС.

Анатоль Глаз удакладніў, што размова ідзе аб дыялогах БРІКС "Афрыка-аўтрыч" і БРІКС "плюс", якія пройдуць у Іаханесбургу.

Пляцоўка саміту БРІКС таксама будзе выкарыстана для арганізацыі сустрэч кіраўніка беларускай дэлегацыі з калегамі з шэрага іншых краін.

версія для друку

зрабіць стартавай

дабавіць у выбранае