Падзеі
Беларусь зацікаўлена ў развіцці добрасуседскіх адносін з Латвіяй - дэпутат
Фота з архiва
7 красавіка, Мінск /Кар. БЕЛТА/. Беларусь зацікаўлена ў развіцці добрасуседскіх адносін і ўзаемавыгаднага супрацоўніцтва з Латвіяй па шырокім спектры пытанняў, заявіла член Пастаяннай камісіі па міжнародных справах Палаты прадстаўнікоў Ганна Старавойтава падчас анлайн-сустрэчы членаў рабочай групы Нацыянальнага сходу па супрацоўніцтве з парламентам Латвіі з Надзвычайным і Паўнамоцным Паслом Латвіі ў Беларусі Эйнарсам Семанісам, перадае карэспандэнт БЕЛТА.
"Беларусь зацікаўлена ў развіцці добрасуседскіх адносін і ўзаемавыгаднага супрацоўніцтва з Латвіяй па шырокім спектры пытанняў. Важным мы бачым актывізацыю супрацоўніцтва паміж Нацыянальным сходам Беларусі і Сеймам Латвіі. Гэта будзе садзейнічаць развіццю двухбаковага ўзаемавыгаднага дыялогу ў духу добрасуседскіх адносін. Упэўнена, што далейшае ўзаемадзеянне паміж нашымі дзяржавамі на ўсіх узроўнях актыўна прадоўжыцца пасля адмены звязаных з пандэміяй абмежаванняў, што ў сваю чаргу будзе садзейнічаць усебаковаму пашырэнню супрацоўніцтва ў інтарэсах нашых народаў. Са свайго боку хацелася б адзначыць, што беларускі парламент адкрыты да дыялогу і гатовы ўзаемадзейнічаць у любым фармаце", - сказала Ганна Старавойтава.
Паводле яе слоў, амаль 30 гадоў як былі ўстаноўлены дыпламатычныя адносіны паміж Беларуссю і Латвіяй. "Нас звязвалі і звязваюць цесныя культурныя і эканамічныя адносіны. Мінулы год паказаў, што свет імкліва змяняецца, і нам бачыцца неабходным адэкватна адаптавацца да новых умоў, правільна распараджацца існуючымі рэсурсамі і беражліва ставіцца да напрацаваных кантактаў, узаемадзейнічаць у інтарэсах нашых народаў. Разам са шматлікімі рызыкамі ўзнікаюць і новыя магчымасці, якімі трэба правільна скарыстацца, - адзначыла дэпутат. - Але дазвольце адзначыць, што да 2020 года адзначалася актывізацыя міжпарламенцкага двухбаковага палітычнага дыялогу, ажыццяўляліся кантакты на ўзроўні кіраўнікоў урадаў, узаемадзеянне паміж міністэрствамі замежных спраў. Але, на жаль, пасля правядзення ў жніўні 2020 года выбараў у Беларусі Латвія замарозіла кантакты з беларускімі афіцыйнымі асобамі, быў зроблены шэраг недружалюбных дзеянняў".
Ганна Старавойтава падкрэсліла, што беларускі народ мае ўсё неабходнае для самастойнага ўстанаўлення стабільнасці ў грамадстве на аснове балансу інтарэсаў усяго насельніцтва. "Мы шчыра разлічваем на ўзважаную, канструктыўную пазіцыю і пацвярджаем гатоўнасць да далейшага плённага супрацоўніцтва на карысць нашых народаў і сусветнай супольнасці, - заявіла яна. - Нягледзячы на напружанасць у палітычнай плоскасці, Беларусь і Латвія актыўна ўзаемадзейнічаюць у эканамічнай сферы. У 2020 годзе двухбаковы тавараабарот з Латвіяй склаў $393,6 млн. Перспектыўныя напрамкі для супрацоўніцтва - дрэваапрацоўка, фармацэўтыка, вытворчасць харчовай прадукцыі, турызм. Беларускі вытворца зацікаўлены ў пастаўках электробусаў, сельскагаспадарчай тэхнікі, ліфтавага абсталявання, будаўнічых матэрыялаў, кабельнай і іншай прадукцыі для забеспячэння патрэбнасці Латвіі. Значны патэнцыял для развіцця двухбаковага супрацоўніцтва ёсць у сферы паслуг, асабліва ў галіне інфармацыйна-камунікацыйных тэхналогій, якая дэманструе ўстойлівы рост у дзвюх краінах".
"Павінен прызнаць, што цяпер ва ўсіх адносінах час вельмі складаны, - дадаў Эйнарс Семаніс. - Але дыпламатычныя каналы камунікацый павінны застацца адкрытымі, і сённяшняя сустрэча, думаю, і ёсць доказ і пацвярджэнне таго. Хачу выказаць надзею, што нашы адносіны могуць развівацца ў будучым. Наш народ сапраўды хоча, каб адносіны былі добрасуседскімі, каб Беларусь была незалежнай, суверэннай, стабільнай, эканамічна развітой і дэмакратычнай краінай. Гэта заўсёды было і ёсць нашай асноўнай устаноўкай", - канстатаваў пасол.
версія для друку
зрабіць стартавай
дабавіць у выбранае