Падзеі

Беларусь з пляцоўкі АБСЕ заклікала прытрымлівацца абавязацельстваў па недапушчэнні дыскрымінацыі ў спорце

17 чэрвеня, Мінск /Кар. БЕЛТА/. Беларусь заклікае не дапускаць дыскрымінацыі ў спорце, што ўваходзіць у масіў абавязацельстваў у АБСЕ. Аб гэтым заявіў саветнік пасольства Беларусі ў Аўстрыі Дзяніс Даўгалёў, выступаючы на пасяджэнні Пастаяннага савета АБСЕ, паведамілі карэспандэнту БЕЛТА ў беларускім знешнепалітычным ведамстве.

Дзяніс Даўгалёў падкрэсліў, што яго расійскі калега закрануў вельмі важную і злабадзённую тэму дыскрымінацыі ў спорце. "На працягу апошняга часу мая краіна неаднаразова сутыкалася з адкрытай дыскрымінацыяй беларускіх спартсменаў на міжнароднай арэне, - звярнуў увагу прадстаўнік Беларусі. - Не спыняюцца спробы выцесніць прадстаўнікоў Беларусі з міжнародных спартыўных пляцовак, забараніць удзел у спаборніцтвах, пазбавіць краіну права правядзення буйных спартыўных форумаў".

Паводле яго слоў, далёка не адзіны, але адзін з найбольш абуральных прыкладаў - рашэнне Выканкама Міжнароднага паралімпійскага камітэта аб адмове ў допуску ўсёй беларускай каманды да ўдзелу ў зімовых Паралімпійскіх гульнях 2022 года ў Пекіне. "Любы спартсмен, незалежна ад нацыянальнай, расавай і іншай прыналежнасці, на працягу ўсяго жыцця песціць мару праявіць сябе на Алімпійскіх гульнях, - прадоўжыў беларускі дыпламат. - Аднак міжнароднымі чыноўнікамі, відавочна, не без палітычнага націску адным росчыркам пяра перакрэслены гады цяжкіх трэніровак нашых паралімпійцаў".

"Лічым гэта рашэнне абуральным парушэннем прынцыпаў бесстароннасці і гарантаванасці роўных магчымасцей для ўсіх людзей у спорце, - заявіў прадстаўнік Беларусі. - Фактычна мы сутыкаемся з адраджэннем сегрэгацыі спартсменаў, у гэтым выпадку - па палітычных матывах і прыналежнасці да канкрэтных краін. Такі падыход падрывае саму аснову і базавыя прынцыпы міжнародных спартыўных спаборніцтваў. У выніку спартсмены становяцца заложнікамі палітычнага націску на дзяржавы, іх правы парушаюцца наперакор палажэнням Алімпійскай хартыі і мноства іншых дакументаў, якія рэгулююць адносіны ў сферы міжнароднага права".

Беларусь заклікае дзяржавы-ўдзельніцы прытрымлівацца абавязацельстваў, узятых на сябе ў АБСЕ, і забяспечыць доступ да міжнародных спаборніцтваў для спартсменаў усіх краін - удзельніц арганізацыі, незалежна ад іх дзяржаўнай прыналежнасці.

версія для друку

зрабіць стартавай

дабавіць у выбранае