Падзеі

Беларусь выступіла ініцыятарам праведзенага ў ААН мерапрыемства на тэму правоў дзяцей

Фота МЗС

27 лютага, Мінск /Кар. БЕЛТА/. Намеснік міністра замежных спраў Беларусі Андрэй Дапкюнас у час візіту ў Жэневу прыняў удзел у тэматычным мерапрыемстве "Правы дзяцей з пункту гледжання Мэт устойлівага развіцця: дружалюбныя і разумныя ўстойлівыя гарады як неабходная ўмова для забеспячэння эфектыўнага ажыццяўлення правоў дзіцяці", арганізаваным у Аддзяленні ААН у Жэневе па ініцыятыве Беларусі сумесна з Дзіцячым фондам ААН (ЮНІСЕФ), Еўрапейскай эканамічнай камісіяй ААН (ЕЭК) і Міжнародным саюзам электрасувязі (МСЭ). Аб гэтым БЕЛТА паведамілі ў прэс-службе МЗС Беларусі.

Такое мерапрыемства па ўліку правоў дзяцей у кантэксце сучаснага гарадскога развіцця з удзелам вядучых агенцтваў ААН арганізавана ў Жэневе ўпершыню. Беларусь выступіла ініцыятарам яго правядзення, зыходзячы са свайго нацыянальнага вопыту па развіцці сеткі гарадоў, дружалюбных дзецям і падлеткам, якая ўжо налічвае 25, уключаючы Мінск.

Удзельнікі мерапрыемства прыйшлі да адзінага меркавання аб прамой сувязі паміж вынікамі развіцця дзяржаў, у прыватнасці, развіцця гарадской інфраструктуры і здольнасцю дзяржаў забяспечваць адэкватны адказ на патрэбнасці развіцця дзяцей і ў канчатковым выніку - належны ўзровень захавання правоў дзіцяці. Была падкрэслена мэтазгоднасць скразнога ўліку дзіцячага фактару пры праграмным планаванні мер нацыянальных урадаў і мясцовых улад па дасягненні Мэт устойлівага развіцця. Удзельнікі дыскусіі звярнулі ўвагу на існаванне шырокага патэнцыялу для паляпшэння ўзаемадзеяння паміж урадамі, мясцовымі гарадскімі ўладамі, агенцтвамі ААН, няўрадавым і прыватным сектарам у мэтах садзейнічання развіццю на краінавым узроўні і забеспячэння інтарэсаў кожнага чалавека і дзіцяці.

Вынікі мерапрыемства, а таксама нацыянальны вопыт Беларусі ў гэтай сферы будуць прадстаўлены ў красавіку 2018 года на форуме мэраў на палях сесіі Еўрапейскай эканамічнай камісіі ААН, а таксама пазней у Кёльне на глабальным форуме гарадоў, дружалюбных дзецям. Плануецца, што вынікі работы па гэтым пытанні на міжнародных пляцоўках будуць карысныя як крыніцы перадавога вопыту для зацікаўленых дзяржаў і агенцтваў сістэмы ААН.

Да ўдзельнікаў мерапрыемства таксама звярнуліся рэгіянальны дырэктар ЮНІСЕФ Афшан Хан, выканаўчы сакратар Еўрапейскай эканамічнай камісіі ААН Вольга Алгаерава, дырэктар бюро стандартызацыі электрасувязі Міжнароднага саюза электрасувязі Чаэсуб Лі. У якасці дакладчыкаў у мерапрыемстве прынялі ўдзел эксперты названых агенцтваў, прадстаўнікі моладзі Беларусі, а таксама шэраг аўтарытэтных міжнародных няўрадавых організацый.

Канцэпцыя гарадоў, дружалюбных дзецям і падлеткам, з'яўляецца праграмай, прызначанай дапамагчы гораду стаць больш добразычлівым да дзяцей ва ўсіх аспектах, якія датычацца кіравання, інфраструктуры і паслуг. Ключавым элементам такіх гарадоў з'яўляецца абавязковы ўдзел дзяцей і моладзі ў працэсах прыняцця рашэнняў, якія закранаюць іх інтарэсы.

Андрэй Дапкюнас правёў асобную сустрэчу з рэгіянальным дырэктарам ЮНІСЕФ па Еўропе і Цэнтральнай Азіі, спецыяльным каардынатарам па пытаннях крызісу, звязанага з бежанцамі і мігрантамі ў Еўропе, Афшан Хан. Бакі абмеркавалі шырокі спектр пытанняў супрацоўніцтва Беларусі і ЮНІСЕФ на нацыянальным і міжнародным узроўнях. Афшан Хан вітала прыхільнасць Беларусі да адкрытага супрацоўніцтва з ЮНІСЕФ, адзначыла наяўнасць важных дасягненняў краіны, перш за ўсё ў сферах дзіцячай аховы здароўя і адукацыі. Рэгіянальны дырэктар выказала гатоўнасць прадоўжыць аказваць неабходнае ўраду Беларусі садзейнічанне ва ўдасканаленні нацыянальнай палітыкі, звязанай з пытаннямі забеспячэння патрэбнасцей і правоў дзіцяці.

У сваю чаргу Андрэй Дапкюнас выказаў задавальненне актыўнай пазіцыяй рэгіянальнага і краінавага офісаў ЮНІСЕФ па прыцягненні ў Беларусь у цесным партнёрстве з галіновымі дзяржаўнымі органамі перадавога міжнароднага вопыту, арыентаванага на забеспячэнне сапраўды ўстойлівага развіцця грамадства, яго інстытутаў і рэалізацыю канцэпцыі забеспячэння правоў і патрэбнасцей кожнага грамадзяніна і кожнага дзіцяці.

версія для друку

зрабіць стартавай

дабавіць у выбранае