Падзеі

28 верасня, Мінск /Кар. БЕЛТА/. Беларусь выступае за павышэнне эфектыўнасці аператыўнай дзейнасці сістэмы развіцця ААН. Аб гэтым намеснік міністра замежных спраў Валянцін Рыбакоў заявіў на сустрэчы з адміністратарам Праграмы развіцця ААН (ПРААН) Хелен Кларк у Нью-Ёрку, паведамілі БЕЛТА ў прэс-службе МЗС Беларусі.

У час сустрэчы бакі абмеркавалі падрыхтоўку да Чатырохгадовага ўсёабдымнага агляду палітыкі ў галіне аператыўнай дзейнасці сістэмы развіцця ААН. Яго мэта - выяўленне і ліквідацыя існуючых недахопаў, а таксама павышэнне эфектыўнасці работы органаў аператыўнай дзейнасці ААН.

"Валянцін Рыбакоў адзначыў, што на маючых адбыцца перагаворах Беларусь будзе настойваць не на радыкальнай перабудове ўсёй сістэмы аператыўнай дзейнасці ААН, а на павышэнні яе эфектыўнасці пры захаванні непалітызаванага падыходу сістэмы і лідзіруючай ролі дзяржаў у выбары шляхоў і метадаў ажыццяўлення парадку дня ўстойлівага развіцця да 2030 года ў адпаведнасці з нацыянальнымі прыярытэтамі і інтарэсамі", - расказалі ў ведамстве.

Намеснік міністра замежных спраў Беларусі выказаў упэўненасць, што ПРААН з улікам свайго багатага практычнага вопыту садзейнічання развіццю зробіць важкі ўклад у распрацоўку гэтага дакумента.

Беларускі дыпламат таксама прадставіў Хелен Кларк вынікі работы Групы прыхільнікаў у падтрымку краін з сярэднім узроўнем даходу. Адзначана, што група паспяхова правяла ў верасні першую міністэрскую сустрэчу пад старшынствам міністраў замежных спраў Беларусі і Коста-Рыкі.

Субяседнікі таксама абмяняліся думкамі наконт працэсу падбору новага Генеральнага сакратара ААН.-