Падзеі
Беларусь стане ганаровым госцем Маскоўскага міжнароднага кніжнага кірмашу
Фота арганізатара
29 жніўня, Масква /Эдуард Півавар - БЕЛТА/. Беларусь стане ганаровым госцем 36-га Маскоўскага міжнароднага кніжнага кірмашу (ММКК), які пройдзе з 30 жніўня па 3 верасня ў Цэнтральным выставачным комплексе "Экспацэнтр", паведамілі БЕЛТА ў прэс-службе гэтага прэстыжнага кніжнага форуму.
Ва ўрачыстым адкрыцці стэнда Рэспублікі Беларусь, якое адбудзецца 31 жніўня, прымуць удзел міністр інфармацыі Уладзімір Пярцоў, старшыня Саюза пісьменнікаў Беларусі Аляксандр Карлюкевіч, старшыня Федэральнай нацыянальна-культурнай аўтаноміі "Беларусы Расіі" Сяргей Кандыбовіч і прадстаўнікі вядучых беларускіх дзяржаўных выдавецтваў.
"Стэнд Рэспублікі Беларусь увасобіць сувязь пакаленняў. У аснову закладзены сумесны гісторыка-асветны праект Міністэрства інфармацыі Беларусі і лаўрэата прэміі Прэзідэнта Рэспублікі Беларусь "За духоўнае адраджэнне" Уладзіміра Ліхадзедава "Бацькаўшчына. У пошуках страчанага". У рамках праекта будуць прадстаўлены: выстава кніг (каля 50 найменняў), вечны каляндар і аднайменная рубрыка ў рэспубліканскіх і рэгіянальных друкаваных выданнях, заснаваныя на ўнікальных архіўных фатаграфіях і паштоўках. Яркім дапаўненнем праекта стане інтэрактыўнае "ажыўленне" фатаграфій, размешчаных на стэндзе Рэспублікі Беларусь. З дапамогай дадатку АіВ, які можна спампаваць на мабільны тэлефон, у наведвальнікаў выставы з'явіцца магчымасць перанесціся ў сучаснасць з фатаграфіяй розных куткоў Беларусі XIX - пачатку ХХ стагоддзя", - расказалі ў прэс-службе.
Беларуская дэлегацыя прадставіць шэраг выдавецкіх праектаў, сярод якіх праект "Генацыд беларускага народа", які падрыхтаваны сумесна з Генеральнай пракуратурай Беларусі і атрымаў шырокі рэзананс. Адбудуцца творчыя сустрэчы з беларускімі пісьменнікамі. А аўтарскі калектыў прадставіць міжнародны праект "Прысмак каляровых рэвалюцый", арганізаваны Аналітычным цэнтрам ЕсооМ сумесна з выдавецкім домам "Беларусь сёння". Наведвальнікаў стэнда таксама чакае знаёмства з новымі кніжнымі серыямі "Свет беларускай класікі" і "Я ганаруся" і шмат іншага.
36-ы ММКК праводзіцца пры падтрымцы Міністэрства лічбавага развіцця, сувязі і масавых камунікацый Расіі, Расійскага кніжнага саюза і ўрада Масква і традыцыйна стане адной з самых значных культурных падзей года. Больш за 300 удзельнікаў з розных рэгіёнаў Расіі, а таксама з Беларусі, Германіі, Казахстана, Кітая і Ірана прадставяць на кірмашы доўгачаканыя навінкі і яркія бестселеры ўсіх жанраў. Тут можна будзе знайсці мастацкую, дзіцячую і вучэбную літаратуру, нон-фікшн, коміксы і падарачныя выданні. За пяць дзён на ММКК адбудзецца больш за 300 мерапрыемстваў на сямі пляцоўках: прэзентацыі кніг, сустрэчы з аўтарамі, дыскусіі, канферэнцыі і семінары. Упершыню будзе працаваць новая пляцоўка "У старонак няма меж", на якой пройдуць прэзентацыі мастацкай і нон-фікшн-літаратуры і майстар-класы. У гэтым годзе ў рамках ММКК упершыню пройдзе Маскоўскі міжнародны дзіцячы кніжны кірмаш.
2023 год аб'яўлены ў СНД Годам рускай мовы як мовы міжнацыянальных стасункаў і гэта падзея таксама знайшла адлюстраванне ў праграме ММКК. Так, 30 і 31 жніўня будзе праходзіць ІІІ Чытацкая асамблея Садружнасці. 31 жніўня адбудзецца пленарнае пасяджэнне "Культура чытання ў СНД: ад агульнага мінулага да вялікай будучыні", на якім будуць абмяркоўвацца пытанні ўмацавання культурных і гуманітарных сувязей, а таксама задачы асветнага характару, якія стаяць сёння перад краінамі - удзельніцамі СНД. У пленарным пасяджэнні прымуць удзел міністр інфармацыі Беларусі Уладзімір Пярцоў, спецпрадстаўнік Прэзідэнта Расіі па міжнародным культурным супрацоўніцтве Міхаіл Швыдкой і многія іншыя. Акрамя таго, на кірмашы пройдзе штогадовая цырымонія ўзнагароджання пераможцаў XX Міжнароднага конкурсу дзяржаў - удзельніц СНД "Мастацтва кнігі", які садзейнічае міжнароднаму супрацоўніцтву выдавецтваў і папулярызацыі кніг у краінах СНД.
версія для друку
зрабіць стартавай
дабавіць у выбранае