Падзеі

Беларусь прыняла ўдзел у сесіі рабочай групы па УПА ў Савеце ААН па правах чалавека

2 лістапада, Мінск /Кар. БЕЛТА/. Беларуская дэлегацыя на чале з Пастаянным прадстаўніком пры Аддзяленні ААН у Жэневе Юрыем Амбразевічам у рэжыме відэа-канферэнц-сувязі 2 лістапада прыняла ўдзел у рабоце 36-й сесіі рабочай групы па ўніверсальным перыядычным аглядзе (УПА) у Савеце ААН па правах чалавека, у рамках якой Беларусь прайшла чарговы (трэці) цыкл УПА. Аб гэтым карэспандэнту БЕЛТА паведамілі ў прэс-службе беларускага знешнепалітычнага ведамства.

У час прадстаўлення нацыянальнага даклада Юрый Амбразевіч праінфармаваў аб сацыяльна-эканамічных і грамадска-палітычных пераўтварэннях у нашай краіне з моманту другога цыкла УПА, які Беларусь прайшла ў 2015 годзе. Беларускі дыпламат прыцягнуў увагу да комплекснага Нацыянальнага плана па правах чалавека, зацверджанага ўрадам Беларусі ў кастрычніку 2016 года. Кіраўнік беларускай дэлегацыі выказаў поўную падтрымку УПА, падкрэсліўшы, што Беларусь разглядае яго як важнейшы інструмент міжнароднага супрацоўніцтва ў сферы правоў чалавека, які забяспечвае разгляд сітуацыі з правамі чалавека ва ўсіх краінах свету, без выключэння, на прынцыпах універсальнасці і раўнапраўя.

"У сувязі з эпідэміялагічнай сітуацыяй работа 36-й сесіі рабочай групы па УПА праходзіць у гібрыдным фармаце, што прадугледжвае абмежаваны асабісты ўдзел прадстаўнікоў беларускай дыпмісіі ў Жэневе і дыстанцыйны ўдзел нацыянальнай дэлегацыі з Мінска, - гаворыцца ў паведамленні. - У склад дэлегацыі Беларусі ўвайшлі першы намеснік старшыні Вярхоўнага Суда Валерый Калінковіч, намеснік генеральнага пракурора Дзмітрый Гара, кіраўніцтва структурных падраздзяленняў міністэрстваў унутраных спраў, замежных спраў, аховы здароўя, інфармацыі, адукацыі, прыродных рэсурсаў і аховы навакольнага асяроддзя, працы і сацыяльнай абароны, юстыцыі, Следчага камітэта, Нацыянальнага цэнтра заканадаўства і прававых даследаванняў, Цэнтральнай камісіі па выбарах і правядзенні рэспубліканскіх рэферэндумаў".

У дыскусіі па ўніверсальным перыядычным аглядзе па Беларусі прынялі ўдзел 98 дзяржаў - членаў ААН, якія ацанілі ступень рэалізацыі нашай краінай рэкамендацый папярэдняга цыкла УПА і адрасавалі Беларусі новыя рэкамендацыі ў сферы правоў чалавека на чарговы перыяд.

УПА - універсальны механізм, створаны ў мэтах агляду сітуацыі з правамі чалавека ва ўсіх краінах свету без выключэння, а таксама ступені рэалізацыі дзяржавамі ўсяго спектра правоў чалавека: эканамічных, палітычных, сацыяльных, грамадзянскіх і культурных. Краіны праходзяць агляд адзін раз у 4,5 года. Першы цыкл УПА Беларусь прайшла ў маі 2010 года, другі - у маі 2015 года.

У ходзе 36-й сесіі рабочай групы па ўніверсальным перыядычным аглядзе ў Савеце ААН па правах чалавека трэці цыкл УПА таксама праходзяць Андора, Балгарыя, Гандурас, Ліберыя, Лівія, Малаві, Манголія, Мальдыўскія астравы, Маршалавы астравы, Панама, ЗША, Харватыя, Ямайка.

версія для друку

зрабіць стартавай

дабавіць у выбранае