Падзеі

10 лістапада, Мінск /Кар. БЕЛТА/. Генеральная Асамблея Арганізацыі Аб'яднаных Нацый 9 лістапада перавыбрала Беларусь у камісію ААН па праве міжнароднага гандлю (ЮНСІТРАЛ), паведамілі БЕЛТА ў прэс-службе беларускага МЗС.

Беларусь з'яўляецца членам ЮНСІТРАЛ з 2004 года. "Цяперашняе аднадушнае перавыбранне ў склад гэтага важнага органа ААН з усёй відавочнасцю прадэманстравала павагу дзяржаў - членаў ААН да збалансаванага падыходу і практычнага ўкладу Беларусі ва ўніфікацыю правіл і працэдур міжнароднага гандлю", - адзначылі ў прэс-службе.

Удзел экспертаў Беларусі ў дзейнасці камісіі і яе рабочых груп у Вене і Нью-Ёрку садзейнічае фарміраванню міжнародна-прававых норм і правапрымяняльнай практыкі ў такіх сферах, як арбітраж і пагаджальная працэдура.

"У якасці члена ЮНСІТРАЛ Беларусь сумесна з іншымі краінамі свету прадоўжыць распрацоўку рэкамендацый па мадэрнізацыі і гарманізацыі права міжнароднага гандлю і ўстанаўленні справядлівых, узгодненых на міжнародным узроўні правіл камерцыйнай дзейнасці", - падкрэслілі ў прэс-службе.