Падзеі

Беларусь можа адклікаць заяўку на ўступленне ў Савет Еўропы, фарматы супрацоўніцтва будуць пераглядацца

Фота з архiва

18 мая, Мінск /Кар. БЕЛТА/. Беларусь можа адклікаць заяўку на ўступленне ў Савет Еўропы. Аб гэтым, адказваючы на пытанне БЕЛТА, заявіў прэс-сакратар МЗС Беларусі Анатоль Глаз.

У горадзе Рэйк'явік 16-17 мая прайшоў саміт Савета Еўропы. У яго падагульняючых дакументах фігуруе і Рэспубліка Беларусь, хоць яна не з'яўляецца членам названай арганізацыі. БЕЛТА папрасіла прэс-сакратара МЗС ацаніць праведзенае мерапрыемства і яго вынікі з пункту гледжання інтарэсаў Беларусі і пракаменціраваць абвінавачанні ў дэпартацыі ўкраінскіх дзяцей.

"Як вы ведаеце, наша ўзаемадзеянне з гэтай арганізацыяй практычна замарожана, і не па нашай ініцыятыве. Хоць у прынцыпе мы ніколі і не ламаліся ў дзверы гэтай арганізацыі. Савет Еўропы канчаткова ператварыўся ў паслухмяны інструмент для націску на непажаданыя Вашынгтону і Бруселю дзяржавы. Гэта структура адназначна працуе на канфрантацыю і падзел, а не аб'яднанне нашага агульнага еўрапейскага дома", - сказаў Анатоль Глаз.

Паводле яго слоў, гэта ўжо зусім не тая арганізацыя, у якую імкнулася трапіць Беларусь 30 гадоў таму. Разгляд пададзенай Рэспублікай Беларусь заяўкі на ўступленне быў замарожаны Саветам Еўропы яшчэ ў 1990-я гады. Тым не менш, за мінулыя гады было зроблена нямала для развіцця ўзаемавыгадных адносін паміж Беларуссю і Саветам Еўропы, рэалізаваны шэраг узаемавыгадных праектаў.

"Выбраўшы курс на дыскрымінацыю і ўшчамленне правоў Рэспублікі Беларусь, развіццё кантактаў з экстрэмістамі, якія заклікаюць да новых санкцый і тэрактаў супраць насельніцтва Беларусі, Савет Еўропы зрабіў усё, каб разбурыць дасягненні папярэдніх гадоў. На жаль, саміт у Рэйк'явіку і яго фінальная дэкларацыя з'яўляюцца відавочным працягам такой палітыкі, - адзначыў прэс-сакратар. - На фоне ўжо звыклых і не маючых нічога агульнага з рэальнасцю абвінавачанняў і патрабаванняў у наш адрас абсалютна дзікім і недарэчным выглядае тэзіс аб датычнасці Беларусі да нібы гвалтоўнага перамяшчэння ўкраінскіх дзяцей. У сувязі з гэтым узнікае рытарычнае пытанне: няўжо для еўрапейскіх палітыкаў, якія выступаюць за прадаўжэнне вайны ва Украіне, задавальненне ўласных палітычных амбіцый важней за жыцці дзясяткаў тысяч дзяцей і іх бацькоў, якія штодзённа і штогадзінна рызыкуюць загінуць у зоне баявых дзеянняў?"

"Беларусь даўно і адназначна вызначылася наконт гэтага: для нас важна кожнае выратаванае жыццё, тым больш жыццё дзіцяці", - падкрэсліў прадстаўнік МЗС.

Ён адзначыў, што Беларусь прымала, прымае і будзе прымаць дзяцей з краін, якія сутыкнуліся з ваеннымі, прыроднымі і тэхнагеннымі крызісамі і катастрофамі. Як гэта рабілася для дзяцей з Японіі пасля аварыі на АЭС у Фукусіме ў 2011 годзе, дзяцей з Сірыі ў перыяд актыўных баявых дзеянняў у 2017 годзе і гэтак далей.

З 2016 года Беларусь прымае дзяцей з Украіны, у тым ліку з Данбаса і, у прыватнасці, з Данецка. "Гэту практыку мы прадоўжылі ў 2022 і 2023 гадах. Толькі ў нацыянальным дзіцячым адукацыйна-аздараўленчым цэнтры "Зубраня" з 2013 па 2022 год адпачылі больш за 12 тысяч дзяцей з 42 краін, у тым ліку па запрашэнні Прэзідэнта Рэспублікі Беларусь.

Пры гэтым часовыя прыезды дзяцей на аздараўленне ў Беларусь адбываюцца з захаваннем адпаведных прававых працэдур. Усе дзеці ўязджаюць і выязджаюць з Беларусі легальна ў суправаджэнні дарослых, маючы на руках усе неабходныя дакументы. Мы робім гэта адкрыта і транспарэнтна, у тым ліку ў супрацоўніцтве з міжнароднымі арганізацыямі і фондамі, уключаючы ЮНІСЕФ.

Неабходна адзначыць, што такая практыка аздараўлення дзяцей за мяжой склалася ўжо даўно і прынята ў многіх краінах свету, у тым ліку ў Еўропе", - акцэнтаваў увагу Анатоль Глаз.

Ад імя Беларусі ён звярнуўся да ўсіх дзяржаў, якія падпісаліся пад дэкларацыяй Савета Еўропы, прынятай у Рэйк'явіку: "Спыніце інструменталізацыю і палітызацыю праблемы аздараўлення ўкраінскіх дзяцей".

Варта адзначыць, што пад гэтым дакументам стаяць подпісы далёка не ўсіх членаў Савета Еўропы. "Такім чынам, нават у гэтай працэдурнай частцы арганізатары саміту, мякка кажучы, выдаюць жаданае за сапраўднае, не гаворачы ўжо аб субстантыве.

Складваецца разуменне, што Савет Еўропы робіць усё для таго, каб цалкам дыскрэдытаваць сябе ў вачах радавых грамадзян, у тым ліку ў Беларусі", - адзначыў прэс-сакратар.

"У выпадку прадаўжэння Саветам Еўропы і Захадам дэструктыўнай лініі ў адносінах да беларускай дзяржавы Рэспубліка Беларусь адкліча сваю заяўку на ўступленне ў гэту структуру і прадоўжыць перагляд астатніх фарматаў адносін з Саветам Еўропы", - заявіў Анатоль Глаз.

версія для друку

зрабіць стартавай

дабавіць у выбранае