Падзеі

Дзмітрый Мірончык праінфармаваў, што 27-29 красавіка кіраўнік МЗС Беларусі Уладзімір Макей знаходзіцца з рабочым візітам у Кітаі. Сёння ён прымае ўдзел у пасяджэнні міністраў замежных спраў краін - членаў НУМДА. "Для Беларусі нарада ўяўляе сабой пляцоўку для пашырэння нацыянальных інтарэсаў у Азіяцка-Ціхаакіянскім рэгіёне, - сказаў прэс-сакратар МЗС. - Падключэнне Беларусі да ўдзелу ў палітычных механізмах НУМДА стварыла дадатковыя каналы для развіцця і ўмацавання кантактаў з краінамі-членамі і наглядальнікамі". Акрамя таго, для беларускага боку гэта магчымасць абменьвацца думкамі па актуальных пытаннях міжнароднага і рэгіянальнага парадку дня, атрымліваць з першых вуснаў аб'ектыўную інфармацыю аб працэсах у краінах Азіі.

У статусе наглядальніка пры НУМДА, які Беларусь атрымала ў 2015 годзе, яна можа далучыцца да работы галіновых механізмаў і тэматычных мерапрыемстваў нарады. "Пазітыўным фактарам у кантэксце ўдзелу ў рабоце НУМДА служыць наяўнасць у яе складзе стратэгічных партнёраў - Расіі, Кітая, Казахстана", - адзначыў Дзмітрый Мірончык. Важную ролю ў рабоце нарады адыгрываюць таксама Іран і Турцыя, з якімі Беларусь падтрымлівае канструктыўны дыялог.

Нарада па ўзаемадзеянні і мерах даверу ў Азіі - гэта вялікі рэгіянальны форум па развіцці і ўмацаванні супрацоўніцтва, бяспекі, эканамічнага росту і стабільнасці ў Азіі. Узаемадзеянне дзяржаў - членаў НУМДА ажыццяўляецца ў рамках прыярытэтных напрамкаў: эканоміка, экалогія, гуманітарнае і ваенна-палітычнае супрацоўніцтва, барацьба з новымі выклікамі і пагрозамі (тэрарызм, адмыванне незаконных даходаў, кантрабанда наркотыкаў, гандаль людзьмі).

Сустрэча міністраў замежных спраў краін - членаў нарады праводзіцца кожныя чатыры гады. Гэта асноўны форум для кансультацый і разгляду ўсіх пытанняў дзейнасці НУМДА.

Нарада аб'ядноўвае 26 краін Цэнтральнай і Паўднёва-Усходняй Азіі, Блізкага Усходу і Паўночнай Афрыкі. Гэтыя краіны вырабляюць трэць сусветнага ВУП, іх насельніцтва перасягае 4 млрд чалавек. Статус наглядальніка пры НУМДА акрамя Беларусі маюць Бангладэш, Інданезія, Ліван, Малайзія, Злучаныя Штаты Амерыкі, Украіна, Філіпіны, Японія.