Падзеі

18 сакавіка, Баку /БЕЛТА - Trend/. Беларусь мае намер пашыраць міжпарламенцкі дыялог з Азербайджанам. Аб гэтым заявіла член Пастаяннай камісіі Савета Рэспублікі Нацыянальнага сходу Беларусі па адукацыі, навуцы, культуры і сацыяльным развіцці Таццяна Нічышына ў час візіту парламенцкай дэлегацыі ў Баку.

"У Азербайджана і Беларусі ёсць шмат агульнага, а міжпарламенцкі дыялог - гэта тая самая пляцоўка, якая сёння запатрабавана, і яго неабходна развіваць", - сказала Таццяна Нічышына.

Паводле яе слоў, мэта візіту беларускіх парламентарыяў у Баку - азнаямленне з дзейнасцю парламента Азербайджана, наладжванне новых кантактаў, пошук агульных інтарэсаў для ўзаемавыгаднага супрацоўніцтва абодвух бакоў у эканамічнай, палітычнай і гуманітарнай сферах.

"У нас адбыліся сустрэчы ў парламенце Азербайджана, у Дзяржкамітэце па праблемах сям'і, жанчын і дзяцей. Было карысна абмяняцца вопытам. У Беларусі актыўна ідзе работа па ўдасканаленні нарматыўна-прававой базы з улікам актуальных сусветных тэндэнцый, і мы з задавальненнем падзяліліся гэтым вопытам з азербайджанскімі калегамі", - адзначыла член Савета Рэспублікі.

На сустрэчах таксама абмеркаваны пытанні ўзаемадзеяння бакоў у міжнародных арганізацыях.

У час візіту беларуская дэлегацыя наведала Цэнтр Гейдара Аліева, Бакінскі славянскі ўніверсітэт, азнаёмілася з дзейнасцю Цэнтра беларускай культуры, высока ацаніла работу, якую праводзіць цэнтр па захаванні самабытнасці, папулярызацыі нацыянальнай культуры Беларусі.

"Сёння, вядома, запатрабаваны сувязі ў сістэме адукацыі, і мы са свайго боку гатовы прапанаваць азербайджанскаму боку прыняць студэнтаў на навучанне, стварэнне летніх школ. Ёсць пэўныя задумкі, і мы будзем працаваць у гэтым напрамку", - падкрэсліла Таццяна Нічышына.