Падзеі

Беларусь гатова да супрацоўніцтва з Томскай вобласцю ў эканамічнай, гуманітарнай і навуковай сферах - Худык

Андрэй Худык. Фота з архіва

28 снежня, Мінск /Кар. БЕЛТА/. Беларусь гатова да супрацоўніцтва з Томскай вобласцю ў эканамічнай, гуманітарнай і навукова-адукацыйнай сферах. Аб гэтым сказаў міністр прыродных рэсурсаў і аховы навакольнага асяроддзя Андрэй Худык у час першага пасяджэння рабочай групы па супрацоўніцтве Беларусі і Томскай вобласці, якое прайшло ў фармаце відэаканферэнцсувязі пад яго старшынствам, паведамілі БЕЛТА ў прэс-службе Мінпрыроды.

Андрэй Худык у сваім уступным слове выказаў надзею на доўгае і плённае супрацоўніцтва і прапанаваў томскім партнёрам шырокую наменклатуру беларускіх тавараў, уключаючы аўтобусную, грузавую, камунальную, дарожна-будаўнічую, лесанарыхтоўчую і сельскагаспадарчую тэхніку, прадукцыю харчовай, лёгкай і сельскагаспадарчай прамысловасці. "Мы прапануем развіваць наша супрацоўніцтва ў эканамічнай, гуманітарнай і навукова-адукацыйнай сферах. Упэўнены, што наша сустрэча пройдзе прадукцыйна, і мы знойдзем агульныя падыходы для развіцця існуючага патэнцыялу", - адзначыў міністр.

Намеснік старшыні рабочай групы з беларускага боку, першы намеснік міністра прыродных рэсурсаў і аховы навакольнага асяроддзя Баляслаў Пірштук выказаў упэўненасць, што ў цесным узаемадзеянні з Томскай вобласцю Беларусь зможа знайсці эфектыўныя шляхі ўзаемавыгаднага супрацоўніцтва ў розных сферах. "План мерапрыемстваў па рэалізацыі пагаднення, падпісаны нашымі бакамі ў 2016 годзе, з'яўляецца дзейсным інструментам для фарміравання прыярытэтаў нашага супрацоўніцтва, а таксама ўзгаднення канкрэтных крокаў па дасягненні пастаўленых мэт. Сёння мы ўмацуем нашы кантакты і пакладзём пачатак будучаму паспяховаму супрацоўніцтву ў розных сферах", - акрэсліў ён.

Са свайго боку губернатар Томскай вобласці Сяргей Жвачкін прапанаваў сканцэнтравацца на пашырэнні тавараабароту, а таксама разгледзець магчымасць вытворчасці новай прадукцыі, у тым ліку інавацыйнай, і адкрыцця сумесных прадпрыемстваў розных форм уласнасці. Губернатар вылучыў ініцыятыву выкарыстоўваць экспартныя магчымасці Беларусі і Томскай вобласці для павелічэння экспартных паставак у Еўропу і Азію. Асобная ўвага была ўдзелена неабходнасці ўмацавання кантактаў і пашырэння ўзаемадзеяння ў галіне навукі, адукацыі, культуры. Сяргей Жвачкин прапанаваў стаць партнёрамі па кліматычным парадку дня.

На заканчэнне Андрэй Худык адзначыў, што для развіцця супрацоўніцтва ёсць вялікая колькасць пунктаў росту па задаволенні патрэбнасцей у сыравіне, камплектуючых, гатовых вырабах, прыродных рэсурсах. "Мы гатовы аказваць усялякую падтрымку беларускім і расійскім суб'ектам гаспадарання ў развіцці экспартна-імпартнага патэнцыялу і нарошчванні аб'ёмаў тавараабароту. Таксама выказваем зацікаўленасць у развіцці супрацоўніцтва ў галіне аховы навакольнага асяроддзя і рацыянальнага прыродакарыстання", - рэзюмаваў міністр.

З беларускага боку ў пасяджэнні прынялі ўдзел і іншыя прадстаўнікі Мінпрыроды: намеснік начальніка галоўнага ўпраўлення экалагічнай палітыкі, міжнароднага супрацоўніцтва і навукі - начальнік аддзела міжнароднага супрацоўніцтва Ларыса Лукіна, галоўны спецыяліст аддзела міжнароднага супрацоўніцтва галоўнага ўпраўлення экалагічнай палітыкі, міжнароднага супрацоўніцтва і навукі Вольга Пагарэлая. Акрамя таго, у відэаканферэнцсувязі ўдзельнічалі прадстаўнікі МЗС, Мінпрама, Мінсельгасхарча, "Беллегпрама", БелГПП, "Магілёўліфтмаша", МАЗа ,"Амкадора", МТЗ, УП "Палімеркаструкцыя", "Лідсельмаша", "Белкамунмаша".

Губернатар Томскай вобласці сустаршынстваваў у пасяджэнні рабочай групы з расійскага боку. У першым пасяджэнні таксама прынялі ўдзел прадстаўнікі Адміністрацыі Томскай вобласці, МЗС Расіі, Томская ГПП, Цэнтр падтрымкі экспарту Томскай вобласці, прадстаўнікі бізнесу і галіновых арганізацый.

версія для друку

зрабіць стартавай

дабавіць у выбранае