Падзеі

Беларусь чакае ад Арменіі канкрэтных крокаў па актывізацыі эканамічнага супрацоўніцтва

Фота пасольства Беларусі ў Арменіі

26 сакавіка, Мінск /Кар. БЕЛТА/. Нягледзячы на агучаныя намеры па актывізацыі двухбаковага эканамічнага супрацоўніцтва, дагэтуль ад армянскага боку не назіраецца канкрэтных крокаў у названым напрамку. Аб гэтым у кароткім інтэрв'ю аднаму з армянскіх медыярэсурсаў у кулуарах канферэнцыі ў Ерэване на тэму "Духоўныя каштоўнасці і сучасная дзяржава" заявіў пасол Беларусі ў Арменіі Ігар Назарук. Такая інфармацыя размешчана на сайце беларускага дыппрадстаўніцтва, паведамляе БЕЛТА.

"Пры гэтым была звернута ўвага на важнейшыя аспекты прапанаваных да рэалізацыі беларускіх праектаў па зборцы трактароў і ліфтаў, такія як надзейнасць, цана, якасць, даступнасць і, самае галоўнае, запатрабаванасць іх у армянскіх фермераў і муніцыпалітэта Ерэвана", - адзначылі ў пасольстве.

У канферэнцыі, арганізатарамі якой выступілі даследча-аналітычная грамадская арганізацыя "Інтэграцыя і развіццё" і Інстытут сеткавых даследаванняў, прынялі ўдзел паслы Беларусі, Казахстана і Расіі, дыпламаты акрэдытаваных у Арменіі дыпмісій, вядомыя прадстаўнікі экспертнай супольнасці Расіі і Арменіі, а таксама Першапрастольнага Святога Эчміадзіна (Армянская апостальская царква).

У прывітальнай прамове пасол Беларусі ў Арменіі адзначыў, што ў кожнай дзяржавы ёсць не толькі свая ідэалогія, але і доўгая гісторыя. "У развітых краінах не прынята адкрыта гаварыць пра ідэалогію, але свае каштоўнасці і ідэалагічныя асновы яны не толькі шануюць і берагуць, але, альбо адкрыта, альбо незнарок, навязваюць іншым народам і нацыям. З развалам СССР не стала той ідэалагічнай платформы, якая нас суправаджала, - добра гэта ці дрэнна пакажа час. Але дзяржава без уласнай сістэмы каштоўнасцей не можа быць ні трывалай, ні даўгавечнай. Пры гэтым было адзначана, што важнейшым пастулатам сучаснай Беларусі з'яўляецца патрыятызм", - расказалі ў пасольстве са спасылкай на выказванні беларускага дыпламата.

Усе прамоўцы на канферэнцыі адзначылі важнасць і актуальнасць узнятай тэмы, лейтматывам якой была неабходнасць захавання і прымнажэння векавых каштоўнасных арыенціраў народаў.

версія для друку

зрабіць стартавай

дабавіць у выбранае