Падзеі

Беларусь атрымала статус наглядальніка ў камітэце СГА па дзяржзакупках

27 чэрвеня, Мінск /Кар. БЕЛТА/. Беларусь атрымала статус наглядальніка ў камітэце Сусветнай гандлёвай арганізацыі па дзяржаўных закупках. Такое рашэнне было прынята сёння па выніках пасяджэння камітэта ў Жэневе, паведамілі БЕЛТА ў пастаянным прадстаўніцтве Беларусі пры аддзяленні ААН і іншых міжнародных арганізацыях у Жэневе.

У рабоце камітэта прыняла ўдзел дэлегацыя Беларусі на чале з першым намеснікам міністра антыманапольнага рэгулявання і гандлю Артурам Карповічам. Рашэнне аб прадастаўленні Беларусі статусу наглядальніка было прынята аднагалосна. У падтрымку выступілі ЗША, ЕС, Японія, Паўднёвая Карэя, Швейцарыя, Сінгапур, Малдова. Канада, Нарвегія. Беларусь стала першай краінай, якая аформіла такі статус да далучэння ў СГА і атрымала права ўдзельнічаць у дыскусіях на пляцоўцы камітэта па дзяржаўных закупках.

Артур Карповіч падзякаваў удзельнікам камітэта за падтрымку і адзначыў, што Беларусі карысны вопыт СГА ў сферы эфектыўнага рэгулявання сектара дзяржзакупак і ўкаранення лепшых сусветных практык у гэтай галіне. Ён праінфармаваў іх аб рэгуляванні рынку дзяржаўных закупак у Беларусі, прадставіў даклад аб апошніх змяненнях у заканадаўстве ў гэтай галіне.

Беларуская дэлегацыя правяла двухбаковыя сустрэчы з прадстаўнікамі сакратарыята СГА і краінамі - членамі гэтай арганізацыі, а таксама прыняла ўдзел у семінары па пытаннях далучэння новых краін да пагаднення СГА па дзяржзакупках. Дасягнута дамоўленасць аб правядзенні сумесна з СГА і ЕБРР у ​​Мінску ў верасні 2018 года рэгіянальнага семінара па дзяржзакупках.

Згодна з усталяванай у СГА працэдурай, перагаворы па далучэнні Беларусі да пагаднення па дзяржаўных закупках будуць пачаты пасля афармлення членства Беларусі ў СГА.

Пагадненне СГА па дзяржаўных закупках з'яўляецца шматбаковым дагаворам з абмежаванай колькасцю ўдзельнікаў і рэгулюе дзейнасць па закупцы тавараў і паслуг для дзяржаўных патрэб. Удзельнікамі пагаднення з'яўляюцца 47 краін - членаў СГА, уключаючы ЕС, ЗША, Канаду, Швейцарыю, Японію, Карэю. З краін - членаў ЕАЭС толькі Арменія з'яўляецца ўдзельнікам шматбаковага пагаднення СГА па дзяржаўных закупках. Расія і Кыргызстан вядуць перагаворы па далучэнні да гэтага міжнароднага дагавора. Казахстан плануе пачаць аналагічныя перагаворы ў 2019 годзе.

версія для друку

зрабіць стартавай

дабавіць у выбранае