Падзеі

Беларусь і ЗША зацікаўлены ў абмене вопытам у барацьбе з наркатрафікам

Фота СК

2 сакавіка, Мінск /Кар. БЕЛТА/. Цэнтральны апарат Следчага камітэта Беларусі наведалі прадстаўнікі Агенцтва па барацьбе з наркотыкамі Міністэрства юстыцыі ЗША на чале з намеснікам рэгіянальнага дырэктара Майклам Навакоскі. Аб гэтым БЕЛТА паведамілі ў СК.

Майкл Навакоскі пачаў выкананне сваіх абавязкаў у студзені бягучага года і курыруе супрацоўніцтва агенцтва з дзевяццю дзяржавамі СНД, уключаючы Беларусь. Тэрытарыяльна агенцтва размяшчаецца ў Казахстане.

Амерыканскаму калегу расказалі аб гісторыі ўтварэння, функцыях і паўнамоцтвах Следчага камітэта, у тым ліку пры расследаванні злачынстваў аб незаконным абароце наркатычных сродкаў. Таксама абмеркаваны некаторыя аспекты ўзаемадзеяння Следчага камітэта з іншымі праваахоўнымі органамі ў ходзе дасудовага крымінальнага вядзення па справах гэтай катэгорыі, магчымасць абмену інфармацыяй.

Адзначаны канструктыўны характар узаемадзеяння, наладжанага з маскоўскім прадстаўніцтвам агенцтва, а таксама падпісанне 21 мая 2019 года ў Мінску мемарандума аб супрацоўніцтве паміж Следчым камітэтам Беларусі і Агенцтвам па барацьбе з наркотыкамі Міністэрства юстыцыі ЗША. У час размовы была падкрэслена зацікаўленасць у вывучэнні замежнага вопыту, абмене перадавымі методыкамі расследавання злачынстваў, звязаных з наркатрафікам, арганізацыі ўзаемных стажыровак, азнаямленні з дзейнасцю акадэміі агенцтва, размешчанай у горадзе Куантыка (ЗША).

У кантэксце мемарандума дасягнута дамоўленасць аб удзеле прадстаўнікоў абодвух ведамстваў у розных мерапрыемствах па антынаркатычнай тэматыцы, што арганізуюцца СК у Беларусі, а таксама праводзяцца ў іншых краінах пры падтрымцы агенцтва. "Праведзеная рабочая сустрэча садзейнічала падтрыманню на высокім узроўні рабочых кантактаў з амерыканскім бокам у сферы процідзеяння злачыннасці", - дадалі ў Следчым камітэце.

версія для друку

зрабіць стартавай

дабавіць у выбранае