Падзеі

22 лютага, Мінск /Аліна Грышкевіч - БЕЛТА/. Беларусь і Украіна 26 лютага плануюць правесці ў Мінску кансультацыі паміж міністэрствамі замежных спраў. Аб гэтым паведаміў сёння на брыфінгу, адказваючы на пытанне карэспандэнта БЕЛТА, начальнік упраўлення інфармацыі і лічбавай дыпламатыі - прэс-сакратар МЗС Дзмітрый Мірончык.

У ліку абмяркоўваемых пытанняў будзе і падрыхтоўка да першага Форуму рэгіёнаў Беларусі і Украіны, які адбудзецца ў гэтым годзе ў Гомелі. У парадак дня ўключаны таксама актуальныя тэмы ўзаемадзеяння ў палітычнай, гандлёва-эканамічнай, гуманітарнай і іншых сферах.

Беларускую дэлегацыю на мерапрыемстве ўзначаліць першы намеснік міністра замежных спраў Андрэй Еўдачэнка.

Як падкрэсліў Дзмітрый Мірончык, Украіна была і застаецца для Беларусі адным з важнейшых палітычных і гандлёва-эканамічных партнёраў. У мінулым годзе актыўна вёўся дыялог на вышэйшым узроўні, працавала беларуска-ўкраінская міжурадавая камісія па гандлёва-эканамічным супрацоўніцтве. У мінулым годзе аб'ём узаемнага тавараабароту вырас да $4,6 млрд. У выніку Украіна заняла другое месца па тавараабароце і экспарце сярод гандлёвых партнёраў Беларусі.

Беларускі бок разлічвае, што правядзенне кансультацый паміж міністэрствамі замежных спраў, якія адбудуцца пасля значнага перапынку, дадуць магчымасць аднавіць практыку аператыўнага ўзаемадзеяння знешнепалітычных ведамстваў дзвюх краін.