Падзеі

Беларусь і Танзанія нацэлены на актывізацыю міжпарламенцкага дыялогу

Фота з архiва

16 кастрычніка, Мінск /Кар. БЕЛТА/. Старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік у рамках удзелу ў 149-й Асамблеі Міжпарламенцкага саюза (МПС) сустрэўся са старшынёй МПС, спікерам Нацыянальнай Асамблеі Танзаніі Туліяй Эксан. Аб гэтым БЕЛТА паведамілі ў прэс-службе верхняй палаты парламента.

На сустрэчы былі разгледжаны пытанні супрацоўніцтва паміж Саветам Рэспублікі і МПС, а таксама Парламентам Танзаніі.

Сяргей Алейнік высока ацаніў работу Туліі Эксан на пасадзе старшыні МПС, яе адкрытую, смелую і справядлівую пазіцыю па шэрагу адчувальных пытанняў, разглядаемых асамблеяй. Праінфармаваў аб падыходах Беларусі да забеспячэння еўразійскай бяспекі на фоне бягучага геапалітычнага крызісу, а таксама аб прагрэсе нашай краіны ў дасягненні Мэт устойлівага развіцця.

Са свайго боку Тулія Эксан прывітала ўдзел Беларусі ў 149-й Асамблеі МПС, прыхільнасць нашай краіны да ідэалаў гэтай арганізацыі, важкі ўклад у забеспячэнне еўразійскай бяспекі. Старшыня МПС адзначыла ролю Беларусі ў пашырэнні міралюбнай палітыкі і падкрэсліла значэнне дыялогу як важнага драйвера парламенцкай дыпламатыі.

Закранаючы двухбаковае супрацоўніцтва Беларусі і Танзаніі, парламентарыі пацвердзілі нацэленасць на актывізацыю міжпарламенцкага дыялогу, падпісанне мемарандума аб узаемадзеянні, абмене вопытам у сферах, якія ўяўляюць узаемны інтарэс. Бакі дамовіліся прадоўжыць узаемадзеянне па шырокім коле пытанняў.

На палях 149-й Асамблеі Міжпарламенцкага саюза Сяргей Алейнік таксама правёў двухбаковыя сустрэчы з кіраўнікамі парламенцкіх дэлегацый. Адбыўся абмен меркаваннямі па разглядаемых на Асамблеі МПС пытаннях, актуальных напрамках развіцця двухбаковых адносін, дасягнуты дамоўленасці аб актывізацыі міжпарламенцкага дыялогу, у тым ліку шляхам стварэння груп дружбы і арганізацыі ўзаемных візітаў.

версія для друку

зрабіць стартавай

дабавіць у выбранае