Падзеі

Беларусь і Сусветны інстытут ядзернай бяспекі дамовіліся аб развіцці больш цеснага супрацоўніцтва

Фота пасольства Беларусі ў Аўстрыі

19 сакавіка, Мінск /Кар. БЕЛТА/. Беларусь і Сусветны інстытут ядзернай бяспекі (WINS) маюць намер развіваць больш цеснае ўзаемадзеянне. Адпаведная дамоўленасць дасягнута на сустрэчы Надзвычайнага і Паўнамоцнага Пасла Беларусі ў Аўстрыі, пастаяннага прадстаўніка Беларусі пры міжнародных арганізацыях у Вене Андрэя Дапкюнаса з выканаўчым дырэктарам Сусветнага інстытута ядзернай бяспекі Ларсам ван Дасэнам. Аб гэтым БЕЛТА паведамілі ў пасольстве Беларусі ў Аўстрыі.

Андрэй Дапкюнас расказаў аб ходзе будаўніцтва Беларускай АЭС, аб паслядоўных комплексных мерах, якія прымаюцца ў краіне для забеспячэння фізічнай бяспекі ядзерных матэрыялаў і абсталявання, а таксама аб актуальным узаемадзеянні Беларусі з МАГАТЭ па гэтым напрамку.

 Ларс ван Дасэн, які кіруе работай інстытута са студзеня 2021 года, падзяліўся сваім бачаннем прыярытэтаў у далейшай дзейнасці СІЯБ, праінфармаваў аб бягучых праграмах інстытута. Ён выказаў зацікаўленасць у развіцці ўзаемавыгаднага супрацоўніцтва з беларускімі ўстановамі.

Бакі дамовіліся вывучыць магчымасць наладжвання больш цеснага ўзаемадзеяння зацікаўленых беларускіх арганізацый з Сусветным інстытутам ядзернай бяспекі і сеткай яго партнёрскіх устаноў.

Сусветны інстытут ядзернай бяспекі створаны пры падтрымцы МАГАТЭ ў 2008 годзе як некамерцыйная няўрадавая арганізацыя, чыя дзейнасць накіравана на садзейнічанне ўмацаванню рэжыму фізічнай ядзернай бяспекі на нацыянальным і глабальным узроўнях, у першую чаргу за кошт садзейнічання распаўсюджванню перадавога вопыту сярод прафесіяналаў у галіне ядзернай бяспекі. Інстытут выступае як міжнародная пляцоўка для абмену думкамі і пошуку новых шляхоў забеспячэння фізічнай бяспекі ядзерных і іншых радыеактыўных матэрыялаў і абсталявання. У ліку важных напрамкаў яго дзейнасці - навучанне і падрыхтоўка персаналу, арганізацыя адукацыйных праграм. Інстытут з’яўляецца афіцыйным наглядальнікам на Генеральнай канферэнцыі МАГАТЭ і ў яго камітэтах па фізічнай ядзернай бяспецы.

версія для друку

зрабіць стартавай

дабавіць у выбранае