Падзеі

25 красавіка, Мінск /Кар. БЕЛТА/. Беларусь і Нідэрланды пацвярджаюць узаемную зацікаўленасць у далейшым пашырэнні палітычнага дыялогу і гандлёва-эканамічнага супрацоўніцтва. Гэта было падкрэслена ў час палітычных кансультацый паміж міністэрствамі замежных спраў дзвюх краін у Гаазе, паведамілі БЕЛТА ў прэс-службе беларускага знешнепалітычнага ведамства.

МЗС Беларусі на кансультацыях прадставіў намеснік міністра замежных спраў Алег Краўчанка, нідэрландскую дэлегацыю ўзначаліў намеснік генеральнага дырэктара па палітычных пытаннях МЗС Пітэр Ян Клейвег Дэ Зваан. Як адзначылі ў беларускім ведамстве, гэта былі першыя ў гісторыі двухбаковых адносін кансультацыі паміж міністэрствамі замежных спраў на ўзроўні намеснікаў міністраў.

Дыпламаты абмеркавалі стан і перспектывы развіцця беларуска-нідэрландскіх адносін у палітычнай, гандлёва-эканамічнай і гуманітарнай сферах, праблематыку правоў чалавека, пытанні ўзаемадзеяння па лініі Беларусь - ЕС, сітуацыю ў рэгіёне. "Бакі пацвердзілі ўзаемную зацікаўленасць у далейшым пашырэнні палітычнага дыялогу, гандлёва-эканамічнага і інвестыцыйнага супрацоўніцтва", - адзначылі ў прэс-службе.

У час візіту ў Гаагу Алег Краўчанка таксама сустрэўся з групай экспертаў у нідэрландскім інстытуце міжнародных адносін "Клінгендаль". Намеснік міністра прадставіў знешнепалітычныя падыходы Беларусі і бачанне рэгіянальнай сітуацыі.