Падзеі

21 мая, Мінск /Таццяна Пастушэнка - БЕЛТА/. Беларусь і М'янма плануюць ратыфікаваць 11 пагадненняў для пашырэння супрацоўніцтва. Аб гэтым паведаміў сёння журналістам старшыня Савета Рэспублікі Нацыянальнага сходу Міхаіл Мясніковіч па выніках сустрэчы з парламенцкай дэлегацыяй М'янмы на чале са старшынёй Палаты нацыянальнасцей Саюзнага сходу Хін Аунг М'інтам, перадае карэспандэнт БЕЛТА.

Міхаіл Мясніковіч адзначыў змястоўны і канструктыўны характар перагавораў, на якіх асноўная ўвага была ўдзелена двум напрамкам супрацоўніцтва - гандлёва-эканамічнаму і міжпарламенцкаму. "Па выніках візіту дэлегацыі М'янмы будзе падрыхтавана сумеснае камюніке, дзе будуць абазначаны асноўныя напрамкі супрацоўніцтва. У тым ліку цяпер на разглядзе бакоў знаходзіцца 11 пагадненняў, і мы дамовіліся, што дадзім адпаведныя даручэнні па лініі парламентаў, каб паскорыць іх разгляд і падпісанне. Безумоўна, будзе арганізавана работа па іх ратыфікацыі ў парламентах", - запэўніў ён.

Вядзецца работа па развіцці двухбаковай дагаворна-прававой базы. Падпісаны міжурадавыя і міжведамасныя пагадненні аб ваенна-тэхнічным супрацоўніцтве, аб гандлёва-эканамічным супрацоўніцтве, аб бязвізавых паездках па дыпламатычных і службовых пашпартах, аб супрацоўніцтве ў галіне сельскай гаспадаркі, аб супрацоўніцтве ў сферы адукацыі. У 2013 годзе ў Нацыянальным сходзе Беларусі сфарміравана рабочая група па супрацоўніцтве з парламентам М'янмы.

Замежныя госці прыбылі ў Беларусь па запрашэнні верхняй палаты парламента. У праграме знаходжання - наведванне шэрага прадпрыемстваў, сацыяльна значных і гісторыка-культурных аб'ектаў.