Падзеі

20 ліпеня, Мінск /Кар. БЕЛТА/. Пасяджэнне беларуска-латвійскай міжурадавай камісіі па эканамічным і навукова-тэхнічным супрацоўніцтве пройдзе 6 верасня ў Рызе. Пытанні яе арганізацыі абмеркавалі міністр замежных спраў Беларусі Уладзімір Макей і прэм'ер-міністр Латвіі Марыс Кучынскіс, паведамілі БЕЛТА ў прэс-службе МЗС.

На сустрэчы ў Рызе бакі разгледзелі выкананне дамоўленасцей, дасягнутых у час лютаўскага візіту латвійскага прэм'ера ў Беларусь.

Уладзімір Макей праінфармаваў аб завяршэнні працэдуры ўзгаднення шляхам абмену дыпламатычнымі нотамі міжурадавага плана мерапрыемстваў па асноўных напрамках супрацоўніцтва на сярэднетэрміновую перспектыву, які ўключае розныя сферы двухбаковага ўзаемадзеяння, у тым ліку эканоміку і гандаль, прамысловасць, экалогію і прыродакарыстанне, рэгіянальнае супрацоўніцтва, турызм, навуку.

Адзначана важнасць выпрацоўкі практычных мер па рэалізацыі плана ў час чарговага пасяджэння міжурадавай камісіі, запланаванага на 6 верасня.

У якасці перспектыўнага напрамку работы вылучана сфера інфармацыйна-камунікацыйных тэхналогій. Абмеркаваны меры па больш актыўнай рэалізацыі патэнцыялу супрацоўніцтва ў транспартна-лагістычнай сферы, у тым ліку з выкарыстаннем магчымасцей індустрыяльнага парка "Вялікі камень".

Кіраўнік МЗС Беларусі правёў у Рызе таксама перагаворы з намеснікам старшыні Сейма Латвіі Гундарсам Даўдзе. Адзначана вялікае значэнне паслядоўнай актывізацыі і павышэння ўзроўню кантактаў паміж парламентамі дзвюх краін для развіцця адносін.

Бакі падкрэслілі важнасць наладжанага рэгулярнага ўзаемадзеяння на ўзроўні старшынь парламенцкіх камісій па бяспецы, міжнародных справах, эканоміцы і высока ацанілі дзейнасць дэпутацкіх груп па супрацоўніцтве.

Уладзімір Макей наведаў Латвійскую нацыянальную бібліятэку і перадаў бібліятэцы кнігу аднаго з заснавальнікаў беларускай дзіцячай літаратуры Янкі Маўра, які нарадзіўся 135 гадоў таму ў латвійскім горадзе Ліепая.

Дыпламат наведаў фонд рэдкіх кніг, звязаных з Беларуссю, азнаёміўся з выстаўкай латвійскіх нацыянальных касцюмаў, прымеркаванай да 100-годдзя незалежнасці Латвіі. Міністр адзначыў важнасць прадаўжэння ўзаемадзеяння паміж нацыянальнымі бібліятэкамі, якія ўносяць значны ўклад у развіццё двухбаковага супрацоўніцтва ў сферы культуры.

Акрамя таго, Уладзімір Макей наведаў латвійскія прадпрыемствы, занятыя ў сферах будаўніцтва комплексных вытворчых аб'ектаў і нерухомай маёмасці, абслугоўвання авіяцыйнай тэхнікі, інфармацыйна-камунікацыйных тэхналогій. Міністр азнаёміўся з дзейнасцю кампаній, абмеркаваў перспектывы развіцця ўзаемавыгаднага супрацоўніцтва.

Напярэдадні адбыліся яго перагаворы з міністрам замежных спраў Латвіі Эдгарсам Рынкевічсам. Кіраўнікі знешнепалітычных ведамстваў з задавальненнем канстатавалі прадаўжэнне традыцыі правядзення штогадовых сустрэч па чарзе ў Рызе і Мінску. Адзначана адсутнасць праблемных момантаў у адносінах паміж Беларуссю і Латвіяй. Асноўны акцэнт зроблены на развіцці супрацоўніцтва ў гандлёва-эканамічнай сферы.