Падзеі

28 верасня, Мінск /Кар. БЕЛТА/. Беларусь і Кувейт абмеркавалі практычныя крокі па ўмацаванні гандлёва-эканамічнага і інвестыцыйнага супрацоўніцтва. Адпаведныя пытанні абмяркоўваліся ў час паездкі ў Кувейт пасла Беларусі ў Аб'яднаных Арабскіх Эміратах і Дзяржаве Кувейт па сумяшчальніцтве Рамана Галоўчанкі, паведамілі БЕЛТА ў прэс-службе МЗС Беларусі.

Адбыліся сустрэчы з намеснікам міністра замежных спраў па пратакольных пытаннях Дары аль-Аджранам, намеснікам міністра замежных спраў па краінах Еўропы Валідам аль-Хубайзі і дырэктарам юрыдычнага дэпартамента МЗС Кувейта Ганімам аль-Ганімам. Пасол Беларусі сустрэўся таксама з намеснікам генеральнага дырэктара Гандлёва-прамысловай палаты Кувейта Хамадам аль-Амарам і дырэктарам дэпартамента міжнароднага эканамічнага супрацоўніцтва Міністэрства фінансаў Кувейта Набілем аль-Мазьядам.

Бакі абмеркавалі актуальныя пытанні двухбаковага парадку дня, перспектыўныя напрамкі беларуска-кувейцкага супрацоўніцтва. Асаблівая ўвага ўдзелена развіццю дагаворна-прававой базы двухбаковых адносін і актывізацыі кантактаў паміж знешнепалітычнымі ведамствамі дзвюх краін. Разгледжаны далейшыя практычныя крокі па ўмацаванні гандлёва-эканамічнага і інвестыцыйнага супрацоўніцтва паміж Беларуссю і Кувейтам.

Раман Галоўчанка азнаёміў кувейцкіх партнёраў з экспартным патэнцыялам Беларусі, вылучыў шэраг найбольш перспектыўных напрамкаў дзелавога супрацоўніцтва: машынабудаванне, сельская гаспадарка, нафтахімічная прамысловасць, будаўнічыя матэрыялы і абсталяванне, металургія і дрэваапрацоўка.