Падзеі

28 мая, Мінск /Кар. БЕЛТА/. Беларусь і Балгарыя павінны актывізаваць навуковае супрацоўніцтва ў галіне фармацэўтыкі і беспілотнай авіяцыйнай тэхнікі. Аб гэтым заявіў старшыня Прэзідыума Нацыянальнай акадэміі навук Беларусі Уладзімір Гусакоў сёння ў час сустрэчы з прэзідэнтам Балгарскай акадэміі навук Юліянам Рэвалскі, паведамілі БЕЛТА ў прэс-службе НАН.

Таксама сярод перспектыўных напрамкаў - даследаванні ў галіне нана- і біятэхналогій, хіміі, святлодыёднай тэхнікі. "Навуковыя арганізацыі НАН Беларусі зацікаўлены ў доўгатэрміновым, сістэмным і ўзаемавыгадным супрацоўніцтве з навуковымі арганізацыямі Балгарскай акадэміі навук", - падкрэсліў Уладзімір Гусакоў.

Балгарскі бок у сваю чаргу зацікаўлены ў пашырэнні супрацоўніцтва па ўсіх галінах, маючых узаемны інтарэс. Да іх ліку адносяцца грамадазнаўчыя навукі і археалогія, рэалізацыя сумесных даследчых праектаў і навуковых мерапрыемстваў, падрыхтоўка навуковых кадраў.

Сёння прэзідэнт Балгарскай акадэміі навук правёў перагаворы з кіраўніцтвам НАН Беларусі, азнаёміўся з экспазіцыяй Музея гісторыі НАН, пастаянна дзеючай выстаўкай НАН Беларусі "Дасягненні айчыннай навукі - вытворчасці". У час візіту члены балгарскай дэлегацыі наведаюць такія арганізацыі НАН, як Аб'яднаны інстытут машынабудавання, НПЦ па матэрыялазнаўстве, Аб'яднаны інстытут праблем інфарматыкі, Інстытут матэматыкі, Інстытут гісторыі і УП "Геаінфармацыйныя сістэмы".

Дэлегацыя Балгарскай акадэміі навук на чале з прэзідэнтам Юліянам Рэвалскі наведвае Беларусь 27-30 мая. Дэлегацыя прыбыла па запрашэнні кіраўніцтва НАН Беларусі. Гэта першы візіт кіраўніка вядучай навуковай арганізацыі Балгарыі ў НАН. Мэта візіту - наведванне арганізацый НАН Беларусі, азнаямленне з іх дзейнасцю, абмеркаванне перспектыўных напрамкаў і механізмаў развіцця супрацоўніцтва. Па выніках візіту плануецца падпісанне абноўленага пагаднення аб супрацоўніцтве паміж НАН Беларусі і Балгарскай акадэміяй навук.