Падзеі

Беларусь і Арменія падпісалі пагадненне аб супрацоўніцтве ў сферы культуры на 2019-2022 гады

28 снежня, Мінск /Кар. БЕЛТА/. Міністэрствы культуры Беларусі і Арменіі падпісалі пагадненне аб супрацоўніцтве на 2019-2022 гады, перадае карэспандэнт БЕЛТА. 

Знамянальна, што пагадненне падпісана ў год 25-годдзя ўстанаўлення дыпламатычных адносін паміж Беларуссю і Арменіяй. З беларускага боку подпіс пад дакументам паставіў міністр культуры Юрый Бондар, з армянскага - Надзвычайны і Паўнамоцны Пасол Арменіі ў Беларусі Армен Гевандзян.

"Супрацоўніцтва паміж міністэрствамі культуры наладжана даўно. Яно з першых дзён мае плённы характар, таму што заснаваны на добрай дагаворна-прававой базе і адпаведным пагадненні, у рамках якога прадугледжаны двух- і трохгадовыя праграмы, дзякуючы якім можна больш шырока прадставіць армянскую культуру ў Беларусі. І я ўпэўнены, нам ёсць што паказаць беларускаму гледачу. Мы ўдзячны за тое садзейнічанне і ўклад, якія Міністэрства культуры Беларусі ўносіць у справу распаўсюджвання беларускай культуры і яе прадстаўлення ў Арменіі. Армянскаму гледачу цікава не толькі азнаёміцца з гістарычнымі пластамі развіцця Беларусі, але і з новымі работамі і праектамі", - адзначыў пасол Арменіі.

Пагадненне прадугледжвае правядзенне Дзён культуры Беларусі ў Арменіі ў 2019 годзе і Дзён культуры Арменіі ў Беларусі ў 2020 годзе, Дзён беларускага кіно ў Арменіі і Дзён армянскага кіно ў Беларусі. Таксама будуць арганізаваны абменныя гастролі тэатраў, музычных і харэаграфічных калектываў. Хоць і ў гэтым годзе артысты Беларусі пастаянна ўдзельнічалі ва ўсіх сумесных мерапрыемствах абедзвюх краін. Дарэчы, у 2018 годзе культурнай сталіцай СНД быў армянскі горад Гарыс, там з поспехам праходзілі канцэрты беларускіх творчых калектываў, праводзіліся выставы Нацыянальнага гістарычнага музея і Нацыянальнага мастацкага музея.

"Сённяшняе пагадненне напоўнена канкрэтным зместам. Мы заўсёды рады бачыць на нашых буйнейшых фестывалях прадстаўнікоў Арменіі. Дні культуры Беларусі пройдуць у Ерэване ў 2019 годзе з удзелам лепшых творчых калектываў краіны", - падкрэсліў міністр культуры Юрый Бондар.

Армянскія артысты змогуць паўдзельнічаць у цыкле канцэртаў "Мінская вясна", фестывалі дзіцячай творчасці "Залатая пчолка", фестывалі мастацтваў "Славянскі базар ў Віцебску", тэатральным фестывалі "Белая Вежа", фестывалі харэаграфічнага мастацтва "Сожскі карагод", дзіцячым конкурсе "Музыка надзеі" і міжнародным фестывалі народнай творчасці "Вянок дружбы".

Арменія чакае прадстаўнікоў Беларусі на Міжнародным конкурсе імя Арама Хачатурана, фестывалях класічнай музыкі "Адраджэнне" і "Ерэванскія перспектывы", тэатральным фестывалі "Армона", Міжнародным тэатральным фестывалі пантамімы, лялечным фестывалі "Дзень туманянаўскай казкі" і тэатральным фестывалі "Армфэст". 

Таксама будуць супрацоўнічаць бібліятэкі, прадугледжаны ўзаемны абмен спецыялістамі нацыянальных бібліятэк Беларусі і Арменіі для развіцця супрацоўніцтва. А музеі дзвюх краін будуць праводзіць сумесныя і абменныя выставы.

Плануецца, што краіны абмяняюцца інфармацыяй па ўліку, ахове, рэстаўрацыі, выкарыстанні і папулярызацыі гісторыка-культурнай спадчыны. Прадоўжыцца супрацоўніцтва па праграмах, што рэалізуюцца ЮНЕСКА, СНД, Саветам Еўропы і Еўрапейскім саюзам.

версія для друку

зрабіць стартавай

дабавіць у выбранае