Падзеі

БДУ і Паўночна-Каўказскі федэральны ўніверсітэт адкрыюць сумесную магістарскую праграму

Фота з архiва

18 студзеня, Мінск /Кар. БЕЛТА/. Пагадненне аб стварэнні сумеснай магістарскай праграмы падпісана паміж БДУ і Паўночна-Каўказскім федэральным універсітэтам (Расія). Подпісы пад дакументам паставілі кіраўнікі ВНУ Андрэй Кароль і Дзмітрый Бяспалаў. Аб гэтым БЕЛТА паведамілі ў прэс-службе БДУ.

"Пагадненне прадугледжвае стварэнне сумеснай магістратуры па падрыхтоўцы спецыялістаў у галіне сацыяльнай работы з наступнай выдачай дыпломаў беларускай і расійскай ВНУ. На гэтым этапе бакі вядуць работу па стварэнні адзінага вучэбнага плана і пераліку вывучаемых дысцыплін. Набор запланаваны на 2022/23 навучальны год", - расказалі ў прэс-службе.

Дакумент таксама рэгулюе абмен прафесарска-выкладчыцкім складам, вучонымі і навучэнцамі, правядзенне сумесных канферэнцый, навуковых і адукацыйных мерапрыемстваў, распрацоўку і публікацыю вучэбных і метадычных матэрыялаў.

Каардынатарам пагаднення ад БДУ выступае кафедра сацыяльнай работы і рэабіліталогіі факультэта філасофіі і сацыяльных навук.

БДУ актыўна супрацоўнічае з універсітэтамі па сумеснай падрыхтоўцы спецыялістаў. У 2017 годзе адкрыты Сумесны кітайска-беларускі інстытут ДПУ-БДУ на базе Даляньскага політэхнічнага ўніверсітэта, а ў 2019 годзе на базе беларускага ўніверсітэта створаны БДУ-ДПУ. Першай сумеснай магістарскай праграмай стала "Гісторыя беларускай дыяспары", падрыхтоўка па якой вядзецца з 2019 года на гістарычных факультэтах БДУ і МДУ імя М.В.Ламаносава. У 2019 годзе падпісана пагадненне аб стварэнні сумеснай магістратуры і аспірантуры паміж БДУ і ДПУ.

Паўночна-Каўказскі федэральны ўніверсітэт (ПКФУ) створаны ў 2012 годзе ў горадзе Стаўрапаль на базе трох буйнейшых ВНУ: Паўночна-Каўказскага дзяржаўнага тэхнічнага ўніверсітэта, Стаўрапольскага дзяржаўнага ўніверсітэта, Пяцігорскага дзяржаўнага гуманітарна-тэхналагічнага ўніверсітэта. У структуру ўніверсітэта ўваходзяць 2 факультэты і 10 інстытутаў. Штат уключае больш за 1,4 тыс. выкладчыкаў, навучаецца больш за 24 тыс. студэнтаў, у тым ліку замежных з 56 краін. ПКФУ супрацоўнічае з больш як 100 універсітэтамі, навуковымі і адукацыйнымі цэнтрамі свету.

версія для друку

зрабіць стартавай

дабавіць у выбранае