Падзеі

Андрэйчанка: Судан з'яўляецца варотамі ў іншыя краіны Афрыкі

16 лістапада, Мінск /Кар. БЕЛТА/. Апошнія гады Беларусь актыўна развівае адносіны з краінамі Афрыкі, заявіў старшыня Палаты прадстаўнікоў Уладзімір Андрэйчанка ў час сустрэчы з Надзвычайным і Паўнамоцным Паслом Судана ў Беларусі Махамедам Амерам Мусой Алі, перадае карэспандэнт БЕЛТА.

"Вы ўжо не першы раз у парламенце, прымалі ўдзел у адкрыцці дзявятай сесіі Палаты прадстаўнікоў. Таму яшчэ раз хачу пажадаць вам паспяховай дыпламатычнай работы ў Беларусі. Перакананы ў тым, што пры вашай актыўнай дзейнасці такія канструктыўныя дружалюбныя адносіны, якія ў нас склаліся паміж Рэспублікай Беларусь і Суданам, будуць і далей развівацца на карысць нашых народаў. Апошнія гады Беларусь вельмі актыўна развівае адносіны з краінамі Афрыкі, дзе вялікую ролю адыгрывае Судан. Больш таго, скажу, што Судан з'яўляецца варотамі ў іншыя дзяржавы Афрыкі, - адзначыў Уладзімір Андрэйчанка. - У студзені 2017 года адбыўся візіт Прэзідэнта Беларусі ў вашу краіну. Гэты візіт стварыў вельмі спрыяльную глебу для развіцця нашага супрацоўніцтва. Восенню 2017 года таксама адбыўся візіт парламенцкай дэлегацыі ў вашу краіну, і пасля гэтага візіту быў рэалізаваны шэраг дамоўленасцей, раней дасягнутых, шэраг кантрактаў па пастаўцы беларускіх трактароў у Судан. Больш за 100 адзінак было пастаўлена. З Судана ажыццявілі пастаўкі арахісу ў Рэспубліку Беларусь для нашых прадпрыемстваў харчовай прамысловасці. Мы тады дамовіліся таксама аб пастаўках з Беларусі ў Судан збожжасховішчаў на суму каля $70 млн".

Тады прайшоў шэраг сустрэч з кіруючымі асобамі Судана, нагадаў спікер. "Мы абмеркавалі пытанні разведкі, здабычы карысных выкапняў. Гэта значыць было вызначана такое шырокае кола пытанняў, па якіх мы мелі намер супрацоўнічаць. На жаль, не ўсё гэта ажыццявілася на сённяшні дзень. Таму ў час сустрэчы з вамі 30 верасня гэтага года Прэзідэнт Рэспублікі Беларусь сказаў, што нам трэба рухацца наперад. Таму, я думаю, што ў час наведвання рэгіёнаў Беларусі вы зможаце адчуць патэнцыял нашай краіны ў эканоміцы, прамысловасці, у галіне сельскай гаспадаркі, культуры, турызму. І вызначыце разам з намі тыя першачарговыя напрамкі, па якіх мы можам прадоўжыць нашу работу", - адзначыў старшыня Палаты прадстаўнікоў.

"У парламенце Рэспублікі Беларусь у нас створана рабочая група па супрацоўніцтве з асобнымі краінамі Паўночнай Афрыкі. Гэта Лівія, Марока, Туніс, Судан. Таму вы ў сваёй дыпламатычнай рабоце заўсёды можаце разлічваць на дапамогу з боку беларускіх парламентарыяў, - падкрэсліў Уладзімір Андрэйчанка. - Я рады сустрэчы з вамі і хацеў бы пачуць ад вас першыя ўражанні аб Рэспубліцы Беларусь і той сітуацыі сацыяльна-эканамічнай, унутрыпалітычнай, якая склалася ў вашай краіне".

Плануецца, што ў ходзе сустрэчы бакі абмяркуюць развіццё міжпарламенцкіх кантактаў, супрацоўніцтва паміж заканадаўчымі органамі абедзвюх краін на міжнародных пляцоўках, пытанні садзейнічання паглыбленню беларуска-суданскага супрацоўніцтва ў гандлёва-эканамічнай і гуманітарнай галінах, а таксама ход рэалізацыі дамоўленасцей, дасягнутых у час візіту ў Судан старшыні Палаты прадстаўнікоў Уладзіміра Андрэйчанкі ў 2017 годзе.

версія для друку

зрабіць стартавай

дабавіць у выбранае