Падзеі

16 сакавіка, Мінск /Кар. БЕЛТА/. Старшыня Палаты прадстаўнікоў Уладзімір Андрэйчанка прапануе развіваць прамысловую кааперацыю Беларусі і Тайланда. Размова аб гэтым ішла на сустрэчы з прэм'ер-міністрам Тайланда Праютам Чан-Оча ў час афіцыйнага візіту беларускай парламенцкай дэлегацыі ў гэту краіну, паведамілі БЕЛТА ў прэс-службе Палаты прадстаўнікоў.

У час сустрэчы адбыўся зацікаўлены абмен думкамі па актуальных пытаннях двухбаковых адносін, выказаны канкрэтныя прапановы па актывізацыі супрацоўніцтва.

У прыватнасці, Уладзімір Андрэйчанка звярнуў увагу прэм'ер-міністра на неабходнасць фарміравання дагаворна-прававой базы, развіццё прамысловай кааперацыі, навукова-тэхнічнага супрацоўніцтва, узаемадзеяння ў сферы адукацыі.

У сваю чаргу Прают Чан-Оча падкрэсліў, што адносіны трэба развіваць ва ўсіх сферах, і абазначыў для гэтага канкрэтныя шляхі. На думку прэм'ер-міністра, візіт старшыні Палаты прадстаўнікоў у Тайланд - першы крок для развіцця супрацоўніцтва, за якім павінны ісці канкрэтныя вынікі.

Абодва бакі віталі падпісанне пагадненняў міжпарламенцкага і міжрэгіянальнага характару ў час бягучага візіту.

Уладзімір Андрэйчанка таксама правёў сустрэчу са старшынёй Федэрацыі прамысловых прадпрыемстваў Тайланда Супантам Мангколсутхрэе, на якой абмяркоўваліся пытанні развіцця прамысловай кааперацыі дзвюх краін.