Падзеі

Андрэй Лучанок назначаны паслом Беларусі ў ААЭ

28 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка назначыў Андрэя Лучанка Надзвычайным і Паўнамоцным Паслом Беларусі ў Аб'яднаных Арабскіх Эміратах і па сумяшчальніцтве ў Дзяржаве Кувейт, Каралеўстве Бахрэйн і Каралеўстве Саудаўская Аравія, перадае карэспандэнт БЕЛТА.

Да гэтага часу Андрэй Лучанок працаваў намеснікам начальніка галоўнага ўпраўлення - начальнікам упраўлення Афрыкі і Блізкага Усходу галоўнага ўпраўлення Азіі, Афрыкі і Лацінскай Амерыкі Міністэрства замежных спраў.

Андрэя Ржавускага, які цяпер узначальвае беларускую дыпмісію ў Індыі і па сумяшчальніцтве ў Шры-Ланцы, кіраўнік дзяржавы таксама назначыў пасол у Бангладэш і Непале па сумяшчальніцтве.

Юрый Гарэлік, які раней працаваў намеснікам дырэктара дэпартамента - начальнікам упраўлення знешнегандлёвай палітыкі Дэпартамента знешнеэканамічнай дзейнасці Міністэрства замежных спраў, узгоднены на пасаду дырэктара гэтага дэпартамента МЗС.

Аляксандр Лукашэнка, звяртаючыся да новага пасла ў ААЭ, падкрэсліў, што прыярытэтнай задачай дыпламата ў гэтым рэгіёне з'яўляецца развіццё гандлёва-эканамічнага супрацоўніцтва.

"Не скажу, што мы за гэты час выбудавалі з імі даволі трывалыя гандлёва-эканамічныя адносіны. Гэта самае галоўнае, чым мы павінны займацца, - канстатаваў кіраўнік дзяржавы. - Палітыка, дыпламатыя, павага, дружба - усё гэта ў мяне з шэйхамі ёсць, і не толькі ў мяне. Поўны давер. Але рэгіён не просты, не бедны. І гандаль мы з ім 
павінны пашыраць. Гэта галоўная ваша задача там. Будуць эканоміка, фінансы і гандаль - будуць і дыпламатыя, і палітыка. Калі гэтага няма, нікому такая дыпламатыя і палітыка не патрэбны".

Андрэй Лучанок, адказваючы на пытанні журналістаў пасля назначэння, растлумачыў, што прэзідэнт паставіў перад ім "канкрэтныя, прадметныя, не тэарэтычныя задачы". "Вядома, што гэты рэгіён мае значныя магчымасці для інвесціравання за мяжу. Наша задача - прыцягнуць гэтыя інвестыцыі ў Беларусь. І другая задача - прасоўваць беларускі экспарт у гэты рэгіён і далей, у іншыя краіны", - удакладніў дыпламат.

Паводле яго слоў, тавараабарот Беларусі з ААЭ дасягае амаль $70 млн. Пры гэтым беларускі экспарт пераважае, знешнегандлёвае сальда - дадатнае. "Але з улікам палітычных адносін, таго ўзаемаразумення, партнёрства, якое ёсць, стаіць задача павялічыць тавараабарот, - адзначыў пасол. - Задача стаіць дыверсіфікаваць экспарт, пастаўляць не толькі калійныя ўгнаенні і цяжкае машынабудаванне, якімі вядома наша краіна, але і харчовую прадукцыю". Беларусь ужо экспартуе ў ААЭ сухое малако. Для паставак іншай прадукцыі харчовай прамысловасці трэба прайсці працэдуру сертыфікацыі. "Арабскія краіны выстаўляюць свае патрабаванні, так званы халяль - асобная працэдура сертыфікацыі. Нашы прадпрыемствы завяршаюць комплекс работ па сертыфікацыі, каб пачаць пастаўкі", - праінфармаваў Андрэй Лучанок.

Асаблівую ўвагу пасля прыбыцця ў краіну назначэння ён мае намер таксама ўдзяляць падрыхтоўцы нацыянальнага стэнда Беларусі для сусветнай выстаўкі "ЭКСПА-2020", якая адкрыецца ў кастрычніку наступнага года ў Дубаі. "Мы на сярэдзіне шляху, распрацоўваем наш павільён, узгадняем яго з эмірацкімі ўладамі. Спадзяёмся, што ў другой палавіне года пачнецца будаўніцтва гэтага павільёна, каб у кастрычніку 2020 года ён пачаў функцыянаваць", - сказаў ён.

версія для друку

зрабіць стартавай

дабавіць у выбранае