Падзеі

Алейнік правёў перагаворы з міністрам эканомікі і прэм'ер-міністрам Пакістана

Сяргей Алейнік і Шахбаз Шарыф. Фота прэс-службы МЗС Беларусі

1 чэрвеня, Мінск /Кар. БЕЛТА/. Міністр замежных спраў Беларусі Сяргей Алейнік 31 мая ў час афіцыйнага візіту ў Пакістан правёў перагаворы з міністрам эканомікі Сардарам Аязам Садзікам і прэм'ер-міністрам Шахбазам Шарыфам. Аб гэтым БЕЛТА паведамілі ў прэс-службе беларускага знешнепалітычнага ведамства.

Як адзначылі ў МЗС, Сяргей Алейнік і Шахбаз Шарыф пацвердзілі дружалюбны характар беларуска-пакістанскіх адносін, нацэленасць на іх далейшае ўмацаванне і развіццё. Бакі абмеркавалі ўвесь комплекс беларуска-пакістанскага супрацоўніцтва, уключаючы рэалізацыю дамоўленасцей, дасягнутых па выніках сустрэч кіраўніка беларускай дзяржавы Аляксандра Лукашэнкі з Шахбазам Шарыфам восенню мінулага года.

"Асаблівая ўвага ўдзелена падрыхтоўцы і эканамічнаму напаўненню будучых візітаў на розных узроўнях. На фоне глабальных выклікаў бакі дамовіліся ўмацоўваць узаемадзеянне ў рамках міжнародных рэгіянальных арганізацый", - расказалі ў міністэрстве.

На сустрэчы з міністрам эканомікі Пакістана разгледжаны актуальныя пытанні пашырэння двухбаковага гандлёва-эканамічнага супрацоўніцтва. Міністры пацвердзілі зацікаўленасць у актывізацыі кантактаў па лініі дзелавых колаў і кіраўніцтва рэгіёнаў дзвюх краін.

"Для надання дадатнай дынамікі ўзаемадзеяння Беларусі і Пакістана ў сферы гандлю, рэалізацыі сумесных праектаў у галіне прамысловасці, сельскай гаспадаркі, фармацэўтыкі, лагістыкі, навукі і адукацыі дасягнута дамоўленасць аб актывізацыі работы па ўзгадненні дарожнай карты па нарошчванні ўзаемнага тавараабароту да 2025 года", - адзначылі ў ведамстве.

Сяргей Алейнік таксама сустрэўся з начальнікам штаба сухапутных войскаў генералам Саідам Асімам Мунірам. Яны абмеркавалі ўзаемадзеянне абаронных ведамстваў дзвюх краін і ваенна-тэхнічнае супрацоўніцтва. "Субяседнікі таксама абмяняліся думкамі аб сітуацыі ў сферы бяспекі ў глабальным і рэгіянальным маштабах", - дадалі ў МЗС.

У Пакістане міністр правёў сустрэчы і з прадстаўнікамі буйнога пакістанскага бізнесу, у час якіх абмеркаваны перспектывы рэалізацыі шэрага праектаў, што ўяўляюць узаемны інтарэс.

версія для друку

зрабіць стартавай

дабавіць у выбранае