Падзеі

Алейнік: Беларусь разлічвае атрымаць пацвярджэнне на хутчэйшы прыём у БРІКС

Фота з архiва

23 жніўня, Мінск /Кар. БЕЛТА/. Беларусь разлічвае атрымаць пацвярджэнне на хутчэйшы прыём у БРІКС. Аб гэтым у сваім каментарыі для СМІ заявіў міністр замежных спраў Беларусі Сяргей Алейнік, які на чале беларускай дэлегацыі прымае ўдзел у саміце БРІКС у ПАР, паведамляе БЕЛТА.

"Саміт БРІКС пачаў сваю работу. Сёння вялікая частка мерапрыемстваў праходзіць у фармаце сустрэч кіраўнікоў дзяржаў і ўрадаў краін - членаў БРІКС. У прынцыповым плане ўсе лідары краін - членаў БРІКС выказалі палітычную падтрымку пашырэнню членскага складу гэтай арганізацыі. І краіны, якія падалі заяўкі, уключаючы Беларусь, разлічваюць атрымаць пацвярджэнне на хутчэйшы прыём у члены гэтай арганізацыі", - заявіў міністр.

Ён падкрэсліў, што БРІКС стаў самадастатковай арганізацыяй, якая садзейнічае фарміраванню больш справядлівых светапарадку і сістэмы эканамічных адносін. "Пашырэнне членскага складу БРІКС дазволіць істотна нарасціць патэнцыял гэтай арганізацыі", - упэўнены міністр.

Сяргей Алейнік адзначыў, што сукупны ВУП краін - членаў БРІКС ужо сёння перавышае аналагічны паказчык краін - членаў "Вялікай сямёркі". А пасля завяршэння працэсу пашырэння БРІКС яшчэ больш павялічыць свой палітычны і эканамічны патэнцыял.

На долю БРІКС цяпер прыпадае 42 працэнты насельніцтва планеты і 31,5 працэнта сусветнага ВУП (а гэта вышэй за паказчык краін G7, ВУП якіх складае 30,7 працэнта сусветнага), каля 20 працэнтаў глабальнага гандлю і 25 працэнтаў прамых інвестыцый.

Міністр таксама расказаў, што 23 жніўня правёў на палях саміту шэраг двухбаковых сустрэч. Яны адбыліся з міністрамі замежных спраў Саудаўскай Аравіі, Экватарыяльнай Гвінеі, з дзяржаўным міністрам ААЭ па міжнародным супрацоўніцтве, дзяржаўным міністрам эканамічнай каардынацыі Анголы, з прэзідэнтам Эрытрэі. "Усе сустрэчы прайшлі ў вельмі канструктыўнай, дружалюбнай атмасферы. Абмеркаваны канкрэтныя пытанні пашырэння двухбаковага супрацоўніцтва ў палітычнай, гандлёва-эканамічнай сферах. Акцэнт зроблены на развіцці ўзаемадзеяння ў галіне сельскай гаспадаркі і вырашэнні пытанняў харчовай бяспекі ў гэтых краінах", - сказаў Сяргей Алейнік.

версія для друку

зрабіць стартавай

дабавіць у выбранае