Падзеі

Актуалізаваны рэгламент Савета Міністраў Беларусі

Фота з архіва

15 снежня, Мінск /Кар. БЕЛТА/. Актуалізаваны рэгламент Савета Міністраў Беларусі. Адпаведная інфармацыя са спасылкай на пастанову Саўміна нумар 710 ад 7 снежня 2020 года размешчана на сайце Мінюста, паведамляе БЕЛТА.

Змяненні абумоўлены правапрымяняльнай практыкай, а таксама неабходнасцю прывядзення ў адпаведнасць з указам ад 17 лістапада 2020 года нумар №415 "Аб павышэнні аператыўнасці і якасці нарматворчай дзейнасці".

Рэгламент выкладзены простай, зразумелай мовай, яго структуры нададзена лагічнасць і паслядоўнасць для даступнага ўспрымання ўсімі дзяржаўнымі органамі (арганізацыямі).

Удакладняецца ступень удзелу Міністэрства юстыцыі ў разглядзе праектаў пастаноў. Мінюст будзе праводзіць абавязковую юрыдычную экспертызу адносна праектаў пастаноў урада, якія маюць нарматыўны характар, уключаючы праекты, у якіх змешчаны дзяржаўныя сакрэты, праекты тэхнічных нарматыўных прававых актаў.

Для ўстаранення прававой нявызначанасці парадак падрыхтоўкі праектаў, прадугледжаны рэгламентам для рэспубліканскіх органаў дзяржкіравання, распаўсюджваецца на іншыя арганізацыі, якім прадастаўлена права самастойна ўносіць праекты ў Савет Міністраў.

Калі ва ўрад унесены праект без неабходных прыкладаемых да яго дакументаў, ён можа быць вернуты распрацоўшчыку без рэгістрацыі ў Апараце Саўміна.

Змяняюцца падыходы па візіраванні праектаў. У выпадку дапрацоўкі ў Апараце Саўміна праект абавязкова візіруецца распрацоўшчыкам і ўзгадняецца з зацікаўленымі (выключэнне складаюць праекты, у якія ўнесены праўкі рэдакцыйнага характару).

Устанаўліваецца таксама новы парадак візіравання праектаў пастаноў і распараджэнняў да прадстаўлення іх на подпіс прэм'ер-міністру. Праекты пастаноў будуць візіравацца міністрам, які распрацаваў праект, і большасцю членаў Прэзідыума Савета Міністраў, праекты распараджэнняў - міністрам, які распрацаваў праект, і намеснікам прэм'ер-міністра, да вядзення якога адносіцца рэгулюемае пытанне.

Асобныя кропкавыя змяненні ў рэгламенце звязаны з удакладненнем парадку падрыхтоўкі пасяджэнняў Савета Міністраў, яго Прэзідыума і матэрыялаў да іх.

З улікам практыкі прымянення ўносяцца змяненні па пытаннях падрыхтоўкі планаў мерапрыемстваў па рэалізацыі заключных палажэнняў заканадаўчых актаў: уносімы ва ўрад план мерапрыемстваў павінен быць узгоднены з Міністэрствам юстыцыі, а план па рэалізацыі законаў - таксама з Нацыянальным цэнтрам заканадаўства і прававых даследаванняў.

Акрамя таго паведамляецца, што дзяржорганы з 1 красавіка 2021 года пяройдуць на выкарыстанне аўтаматызаванай інфармацыйнай сістэмы ў нарматворчай дзейнасці. Гэта сістэма распрацавана Нацыянальным цэнтрам прававой інфармацыі і будзе выкарыстоўвацца ўсімі дзяржорганамі пры накіраванні праектаў на ўзгадненне, абавязковую юрыдычную, крыміналагічную экспертызу, а таксама пры ўнясенні ва урад, уключаючы іх наступнае візіраванне або падпісанне.

версія для друку

зрабіць стартавай

дабавіць у выбранае