Падзеі

Абмен студэнтамі і падрыхтоўка арабістаў. Што абмеркавалі пасол ААЭ і рэктар БДУ

Фота БДУ

25 кастрычніка, Мінск /Кар. БЕЛТА/. Прапановы па супрацоўніцтве з Аб'яднанымі Арабскімі Эміратамі (ААЭ) абмеркавалі ў БДУ, паведамілі БЕЛТА ва ўстанове адукацыі.

Прапановы былі агучаны ў час візіту ў беларускі ўніверсітэт Надзвычайнага і Паўнамоцнага Пасла ААЭ ў Рэспубліцы Беларусь Ібрагіма Саліма Махамеда Аль-Мушараха.

Наведванне БДУ абумоўлена намерам развіваць партнёрскія адносіны ў сферы адукацыі і навукі. У прыватнасці, важнай тэмай дыскусіі стала перспектыва супрацоўніцтва з адной з найноўшых ВНУ ААЭ - Універсітэтам аль-Касімія ў горадзе Шарджа. Прыярытэтнымі напрамкамі названы забеспячэнне акадэмічнай мабільнасці ў фармаце абмену студэнтамі і выкладчыкамі і развіццё міжнародных адносін.

Увагу ўдзялілі і пытанню падрыхтоўкі ў БДУ спецыялістаў-арабістаў. "Маё знаходжанне тут сведчыць, што паміж грамадствамі нашых краін, нягледзячы на геаграфічную аддаленасць, існуюць трывалыя сувязі, у тым ліку дзякуючы мове. Мова - гэта тая аб'яднальная сіла, якая дазваляе нашым народам доўгія гады падтрымліваць адносіны на дастойным узроўні", - заўважыў пасол. Ён таксама выказаў гатоўнасць аказаць дапамогу ў арганізацыі розных форм узаемадзеяння, звязаных з развіццём і выкладаннем арабскай мовы.

Ініцыятыву падтрымаў рэктар БДУ Андрэй Кароль. "Мова ў сучасным свеце - гэта не проста сродак камунікацыі, але і значна больш глыбокая падстава для таго, каб чалавек выказваў сваё мысленне і свядомасць. Сёння многія дысцыпліны, такія як IT, штучны інтэлект або нейрасеткі, прыродазнаўчыя, фізічныя прадметы, так ці інакш "асуджаны" на супрацоўніцтва з лінгвістычнымі спецыяльнасцямі. Мы гэта бачым на прыкладзе нашага ўніверсітэта і падтрымліваем гэту міждысцыплінарную сувязь", - дадаў рэктар.

Пасол таксама наведаў ФМА, дзе для студэнтаў арганізавалі дыскусійную пляцоўку для абмеркавання міжнароднага парадку дня, супрацоўніцтва Беларусі і ААЭ.

Супрацоўніцтва паміж БДУ і ААЭ ажыццяўляецца з 2007 года ў рамках бестэрміновага дагавора з Універсітэтам ААЭ.

версія для друку

зрабіць стартавай

дабавіць у выбранае