Прамовы і інтэрв’ю

28 мая, Мінск /Кар. БЕЛТА/. Латвія цэніць канструктыўную пазіцыю Беларусі па крызісе ва Украіне. Аб гэтым заявіў сёння Надзвычайны і Паўнамоцны Пасол Латвійскай Рэспублікі ў Рэспубліцы Беларусь Міхаіл Папкоўс на канферэнцыі, прысвечанай вынікам Рыжскага саміту ініцыятывы "Усходняе партнёрства", перадае карэспандэнт БЕЛТА.

"Наша краіна цэніць канструктыўную пазіцыю Беларусі адносна ўкраінскага крызісу і лічыць, што ёсць усе магчымасці для канструктыўнага развіцця беларуска-латвійскіх адносін", - сказаў пасол. Ён адзначыў, што толькі выкананне мінскіх дамоўленасцей прывядзе да стабілізацыі сітуацыі ва Украіне.

Акрамя таго, Міхаіл Папкоўс адзначыў: "Рыжскі саміт паказаў, што мы рухаемся да ўсё большай мабільнасці і садзейнічаем рэформам і чалавечым кантактам". Таксама, паводле яго слоў, актывізацыя адносін ЕС з Беларуссю сведчыць аб стабільным руху наперад. "Далейшае развіццё супрацоўніцтва з Еўрапейскім саюзам - у руках самой Беларусі. Мы адкрыты і гатовы да супрацоўніцтва, заснаванага на ўзаемным разуменні, у той жа час не адступаючы ад еўрапейскіх каштоўнасцей", - дадаў ён.

Латвійскі дыпламат звярнуў увагу, што спектр меркаванняў наконт Рыжскага саміту і ініцыятывы "Усходняе партнёрства" даволі шырокі. Ёсць і негатыўныя і пазітыўныя меркаванні. Старшынства Латвіі ў Еўрапейскім саюзе, у час якога і адбыўся Рыжскі саміт, выпала на даволі складаны перыяд: ва Украіне ідзе ўзброены канфлікт, у ЕС тармозіцца эканамічны рост і г.д.