Прамовы і інтэрв’ю
Начальнік Генштаба: у Беларусі гатовы адэкватна рэагаваць на правакацыі, як у Курскай вобласці
16 жніўня, Мінск /Кар. БЕЛТА/. У Беларусі гатовы адэкватна рэагаваць на правакацыі, як у Курскай вобласці Расіі. Аб гэтым заявіў журналістам начальнік Генеральнага штаба Узброеных Сіл Беларусі Павел Муравейка, перадае карэспандэнт БЕЛТА.
Падводзячы вынікі праведзенай у кіраўніка дзяржавы Аляксандра Лукашэнкі нарады па пытаннях ваеннай бяспекі, Павел Муравейка сказаў: "Прэзідэнтам краіны традыцыйна ўдзяляецца пільная ўвага праблематыцы бяспекі. Граніца - гэта той рубеж, які пастаянна знаходзіцца ў полі зроку кіраўніка дзяржавы. Мы сёння абмеркавалі тыя ўмовы, фактары, пагрозы, якія канцэнтруюцца на паўднёвым аперацыйным напрамку, на нашай паўднёвай граніцы".
"Абстаноўка, шчыра кажучы, няпростая. Канцэнтрацыя войскаў, мерапрыемствы, якія праводзяцца ўкраінскім бокам у нашым прыграніччы, дзеянні, якія сёння выклікалі рэзананс у сусветным маштабе на Курскім напрамку, прымушаюць нас задумацца, ці можам мы процідзейнічаць такім выклікам і пагрозам", - заявіў начальнік Генштаба.
Паводле яго слоў, на нарадзе кіраўнік беларускай дзяржавы канкрэтна спытаў кіраўніцтва ваеннага ведамства, да чаго гатовы Узброеныя Сілы і як будзе арганізавана процідзеянне, калі ўзнікне такая неабходнасць. "Міністрам абароны адпаведная інфармацыя даложана, Узброеныя Сілы гатовы выконваць задачы і адэкватна рэагаваць на любыя правакацыі і выклікі, якія могуць ісці супраць нашых граніц і нашай дзяржавы", - сказаў Павел Муравейка.
Ён расказаў аб узмацненні ваеннай прысутнасці на паўднёвым напрамку. Перагледжаны склад сіл і сродкаў, якія прыцягваюцца для гарантавання бяспекі дзяржавы. "Мы стварылі неабходныя ўмовы для разгортвання груповак з цяжкай тэхнікай, адэкватна гатовы адрэагаваць на такія правакацыі, як адбыліся ў Курску (Курскай вобласці Расіі. - Заўвага БЕЛТА). Мы кантралюем нашу дзяржаўную граніцу, нарасцілі сілы і сродкі разведкі, вядзём стварэнне пэўных запасаў і магчымасцей для стварэння і разгортвання груповак", - расказаў начальнік Генштаба.
версія для друку
зрабіць стартавай
дабавіць у выбранае