Падзеі, факты, анонсы

25 чэрвеня, Мінск /Кар. БЕЛТА/. Баскетбалісткі зборнай Беларусі выйшлі ў паўфінал чэмпіянату Еўропы і забяспечылі сабе месца ў алімпійскай кваліфікацыі, паведамляе карэспандэнт БЕЛТА.

У чвэрцьфінальным паядынку супраць каманды Літвы падапечныя Анатоля Буяльскага ўвесь час ўпэўнена вялі ў ліку, але ў канцоўцы страцілі сваю вялікую перавагу і ў выніку перамаглі толькі з розніцай у два ачкі - 68:66 (16:10, 17:9, 18:24, 17:23). Гульнявыя паказчыкі лідараў беларускай дружыны: Верамеенка - 15 ачкоў і 9 падбораў, Ліхтаровіч - 14 і 3, Хардзінг - 12 і 8, Сныціна -11 і 4.

У паўфінале 26 чэрвеня беларускі згуляюць з камандай Сербіі, якая перамагла ў чвэрцьфінале турэцкіх баскетбалістак з лікам 75:63 (18:18, 10:9, 26:11, 21:25).

Сёння вечарам адбудуцца яшчэ два чвэрцьфінальныя матчы: Іспанія - Чарнагорыя (пачатак гульні ў 19.00 па мінскім часе), Францыя - Расія (21.30).

Пераможцы паўфінальных сустрэч 28 чэрвеня ў Будапешце згуляюць у матчы за чэмпіёнскі тытул, а каманды, якія прайграюць, паспрачаюцца за бронзавыя медалі.

Цяперашні чэмпіянат Еўропы з'яўляецца адным з этапаў адбору на Алімпійскія гульні-2016 у Рыа-дэ-Жанэйра. Чэмпіён кантынента атрымае прамую пуцёўку на Алімпіяду, а каманды, якія занялі 2-5-я месцы, стануць удзельнікамі перадалімпійскага кваліфікацыйнага турніру, які адбудзецца з 13 па 19 чэрвеня 2016 года. У ім за 5 пуцёвак у Рыа паспаборнічаюць 12 каманд - 4 ад Старога Свету, 3 - ад Амерыкі, па 2 - ад Азіі і Афрыкі, 1 - ад Акіяніі.

Два гады таму на мінулым Еўрабаскеце ў Францыі чэмпіёнкамі сталі баскетбалісткі зборнай Іспаніі, якія перамаглі ў вырашальным паядынку францужанак з лікам 70:69. Бронзавыя ўзнагароды заваявала каманда Турцыі, яна разграміла ў матчы за 3-е месца зборную Сербіі - 92:71.

Зборная Беларусі ў дэбютным для сябе першынстве Старога Свету ў Італіі-2007 стала ўладальніцай бронзы, у Латвіі-2009 падапечныя Анатоля Буяльскага фінішавалі на чацвёртым месцы, у Польшчы-2011 беларускі не змаглі прабіцца ў плэй-оф, а ў Францыі-2013 пад кіраўніцтвам літоўскага спецыяліста Рымантаса Грыгаса выбылі ў чвэрцьфінале пасля паражэння ад турчанак.