Падзеі, факты, анонсы

27 кастрычніка, Масква /Эдуард Півавар - БЕЛТА/. Першы двухпавярховы электрапоезд новага пакалення, выпушчаны на сумесным беларуска-швейцарскім прадпрыемстве ЗАТ "Штадлер Мінск", зрабіў сёння першы рэйс у Маскве з Кіеўскага вакзала ў аэрапорт Унукава, паведамілі БЕЛТА ў прэс-службе пасольства Беларусі ў Расіі.

Двухпавярховы поезд быў выраблены для ТАА "Аэраэкспрэс", што ажыццяўляе інтэрмадальныя пасажырскія перавозкі. Гэта транспартнае прадпрыемства плануе да канца 2017 года запусціць двухпавярховыя саставы яшчэ па адным маскоўскім маршруце: паміж Павялецкім вакзалам і аэрапортам Дамадзедава.

"Абнаўленне рухомага транспарту - адзін з этапаў развіцця кампаніі "Аэраэкспрэс" напярэдадні чэмпіянату свету па футболе - 2018, які пройдзе ў неколькіх расійскіх гарадах. І мы ўпэўнены, што масквічы і госці сталіцы змогуць па заслугах ацаніць усе тэхналагічныя навацыі, рэалізаваныя ў гэтых паяздах", - сказаў на цырымоніі адпраўлення першага састава міністр транспарту Расіі Максім Сакалоў. Ён падкрэсліў, што першы прыбыўшы ў Маскву двухпавярховы састаў атрымаў назву "Еўразія". Усяго "Аэраэкспрэс" набыў у "Штадлер Мінск" 11 саставаў.

"Наша сумесная з беларусамі кампанія "Штадлер Мінск" стала лідарам па экспарце па рэзультатах работы ўсіх аналагічных кампаній швейцарскага прадпрыемства Stadler за мінулы год, - сказаў журналістам дырэктар па маркетынгу і продажах галаўнога завода Матыяс Штэр. - Сёння яна пастаўляе сваю прадукцыю не толькі ў краіны СНД, але і ў некаторыя дзяржавы Еўрасаюза".

Саставы беларускай зборкі спраектаваны спецыяльна пад асаблівыя кліматычныя ўмовы, дзе тэмпература можа вар'іравацца ад мінус 50 да плюс 40 градусаў. Яны здольны развіваць скорасць да 160 км/гадз. У чатырохвагонных паяздах - 396 сядзячых месц, у шасцівагонных - 700, з іх 84 месцы бізнес-класа.