Падзеі, факты, анонсы
Выдавецкія праекты БЕЛТА "Апошнія сведкі" і "Архівы. Нічога, акрамя праўды" прадставілі на кніжнай выстаўцы
14 сакавіка, Мінск /Кар. БЕЛТА/. Выдавецкія праекты БЕЛТА "Апошнія сведкі" і "Архівы. Нічога, акрамя праўды" прадставілі на ХХХІ Мінскай міжнароднай кніжнай выстаўцы-кірмашы.
"Сёння мы прэзентуем два кніжныя праекты - "Апошнія сведкі" і "Архівы. Нічога, акрамя праўды". Гэтыя два выдавецкія праекты мы рэалізавалі ў мінулым годзе з партнёрамі: Генеральнай пракуратурай Беларусі і Міністэрствам юстыцыі Беларусі", - сказаў першы намеснік генеральнага дырэктара БЕЛТА Васіль Мацвееў.
Ён расказаў, як пачыналася работа над кнігай "Апошнія сведкі". "У наша распараджэнне трапілі 9 дыскаў з допытамі сведак, якія ў рамках расследавання крымінальнай справы аб генацыдзе беларускага народа праводзілі следчыя Генеральнай пракуратуры. Мы адштурхнуліся ад гэтых відэа і ўстанавілі, што людзі, якія давалі паказанні, на свае вочы бачылі жахі, што чыніліся акупантамі. Гэта тыя, хто сядзеў у лагерах, тыя, каго зганялі на прымусовыя работы, тыя, хто пазбавіўся сваякоў у час жахлівых карных аперацый", - адзначыў Васіль Мацвееў.
Праект падтрымаў генеральны пракурор Андрэй Швед. Спачатку праект выходзіў публікацыямі ў газеце "7 дней", на сайце БЕЛТА, а далей быў выдадзены кнігай.
Пры распрацоўцы праекта "Архівы. Нічога, акрамя праўды" адштурхоўваліся ад Нацыянальнага архіва Беларусі, а сам праект падтрымаў міністр юстыцыі Сяргей Хаменка. "Журналістам БЕЛТА былі перададзены ўнікальныя дакументы, над якімі працавала рабочая група разам з даследчыкамі. Архівісты Вячаслаў Селяменеў і Святаслаў Кулінок дапамагалі прадастаўляць даныя, на якія абапіраліся журналісты пры падрыхтоўцы праекта, які ў далейшым таксама стаў кнігай", - адзначыў Васіль Мацвееў.
Абодва праекты былі высока ацэнены, ёсць Гран-пры на нацыянальным конкурсе СМІ, а за кнігу "Апошнія сведкі" Генеральная пракуратура, Беларускае тэлеграфнае агенцтва і Нацыянальная дзяржаўная тэлерадыёкампанія былі ўдастоены спецыяльнай прэміі Прэзідэнта дзеячам культуры і мастацтва.
"Мы вельмі ганарымся, што змаглі ўнесці невялікую крыху інфармацыі ў вялізную паўнаводную раку ўсенароднай памяці аб тых страшных падзеях, якія адбываліся ў гады вайны", - падкрэсліў першы намеснік генеральнага дырэктара БЕЛТА.
версія для друку
зрабіць стартавай
дабавіць у выбранае