Падзеі, факты, анонсы
У Беларусі водзяцца медузы. Як яны тут з'явіліся і ці небяспечны для нашай экасістэмы?
Фотa Global Look Press
14 жніўня, Мінск /Кар. БЕЛТА/. Як у Беларусі з'явіліся медузы і ці небяспечны яны для нашай экасістэмы, расказала карэспандэнту БЕЛТА вядучы навуковы супрацоўнік лабараторыі гідрабіялогіі НПЦ НАН Беларусі па біярэсурсах, кандыдат біялагічных навук Таццяна Ліпінская.
Нядаўна ў інтэрнэце пачало набіраць папулярнасць відэа з медузамі, якія з'явіліся на Заходняй Дзвіне. "Гэта не першы выпадак, кал ў нас з'яўляюцца медузы. Так, у мінулым годзе прысылалі ўжо нам такія відэа з Заходняй Дзвіны", - адзначыла навуковы супрацоўнік лабараторыі гідрабіялогіі НПЦ НАН Беларусі па біярэсурсах.
Паводле яе слоў, упершыню беларускія вучоныя знайшлі медуз вясной 2018 года пры дапамозе малекулярных метадаў. Па астатках ДНК іх выявілі ў Нёмане, Прыпяці і Дняпры. Потым мясцовыя жыхары пачалі прысылаць фатаграфіі масавага развіцця гэтых медуз.
"Першыя знаходкі былі ў Брэсцкім вяслярным канале. Летам, калі вада праграваецца вышэй за 25 градусаў, медузы пачынаюць размнажацца, іх становіцца шмат і яны ўсплываюць на паверхню", - дадала Таццяна Ліпінская.
Медуза - чужародны від для Беларусі. Як растлумачыла вучоны, хутчэй за ўсё медузы трапілі ў нашу прыроду з акварыумнымі раслінамі або жывёлінамі. Пры гэтым у Еўропе медузы ўжо вельмі даўно і паўсюль распаўсюджаны. Ёсць даныя, што яны могуць пераносіцца на апярэнні птушак.
"Медузы могуць выклікаць алергічныя рэакцыі, асабліва, калі іх шмат", - заявіла кандыдат біялагічных навук.
Таццяна Ліпінская папярэдзіла, што выпускаць з акварыумаў экзатычных істот не варта. "Іх да апошняга трэба трымаць дома і не выкідваць у рэкі, унітазы або вадаёмы. На першы погляд здаецца, што трапічны від не прыжывецца, але ва ўмовах пацяплення і змянення клімату яны вельмі добра адаптуюцца, а потым наносяць урон нашым абарыгенным відам і экасістэмам", - рэзюмавала навуковы супрацоўнік лабараторыі гідрабіялогіі НПЦ НАН Беларусі па біярэсурсах.
Паколькі медузы былі заўважаны ў Беларусі параўнальна нядаўна, яшчэ няма даследаванняў, ці на самай справе яны наносяць шкоду навакольнаму асяроддзю Беларусі.
версія для друку
зрабіць стартавай
дабавіць у выбранае