Падзеі, факты, анонсы

Школьнікі прывезлі кавуны і бульбу з прэзідэнцкага поля ў дом-інтэрнат

8 верасня, Мінск /Кар. БЕЛТА/. Вучні 8-11-х класаў Астрашыцка-Гарадоцкай сярэдняй школы прывезлі кавуны і бульбу жыхарам падшэфнага Мінскага дома-інтэрната для пенсіянераў і інвалідаў, паведамляе БЕЛТА.

 

Усяго ў дом-інтэрнат даставілі 5 т кавуноў, сабраных 5 верасня на прэзідэнцкім полі, а таксама тону бульбы сорту "маніфест" - яе вырошчваюць на падворку Прэзідэнта ў Астрашыцкім гарадку.

Школьнікі дапамаглі з разгрузкай, а затым наведалі жыўнасць на мясцовай міні-ферме, якую адкрылі ў інтэрнаце ў маі гэтага года. Там ужо жывуць куры-нясушкі, певень, трусы. У апошніх, дарэчы, ужо з'явілася патомства, якое літаральна на мінулым тыдні перадалі з дома-інтэрната ў дзіцячы дом.

Пасля завяршэння ўсіх работ адбылася сумесная дэгустацыя прывезеных кавуноў.

Як паведамлялася БЕЛТА, гісторыя сяброўства вучняў школы з жыхарамі дома-інтэрната налічвае шмат гадоў: школьнікі рэгулярна наведваюць пажылых людзей з канцэртамі і падарункамі, а таксама дапамогай, якую там вельмі чакаюць.