Падзеі, факты, анонсы
Шчасця і новых здзяйсненняў. Дзеці падарылі Лукашэнку жывую елку з пажаданнямі
31 снежня, Мінск /Кар. БЕЛТА/. Пацыенты Мінскай абласной дзіцячай клінічнай бальніцы падарылі Аляксандру Лукашэнку жывую елку з чырвонымі папяровымі сэрцайкамі, на якіх напісаны цёплыя пажаданні, перадае карэспандэнт БЕЛТА.
"У Палацы Незалежнасці мы ўстановім гэту елачку. Яе трэба паліваць часцей. Вы ўгадалі. Я вельмі люблю прыроду і дрэвы. Дзякуй вам. Абавязкова на самым бачным месцы ў Палацы Незалежнасці паставіце падарунак ад дзетак", - сказаў кіраўнік дзяржавы.
Адна з юных пацыентак ад імя ўсіх дзяцей пажадала Аляксандру Лукашэнку шчасця, здароўя, поспехаў і ўдачы на выбарах.
Кіраўнік дзяржавы таксама пабываў у палаце, дзе маленькія дзеці знаходзяцца разам з іх мамамі. "З аднаго боку, гаротныя мамы. Таму што перажываюць за хворых дзетак. Я ведаю, што такое хворае дзіця. Я чалавек не з пужлівых, але, калі дзіця ў мяне хварэла, - гэта катастрофа. Гэта не толькі стрэс. Гэта наогул цяжка для мяне. Тэмпература - усё, я ўжо за дзіця перажываў страшна", - падзяліўся Аляксандр Лукашэнка.
Ён станоўча адзначыў той факт, што ёсць магчымасць дзецям знаходзіцца ў бальніцы разам з бацькамі. І, вядома ж, павіншаваў усіх маленькіх пацыентаў з Новым годам, уручыўшы падарункі. У наборах у тым ліку плюшавыя мішкі і шакаладкі.
"І вас з надыходзячым Новым годам. Жадаю шчасця, здароўя, каб былі толькі адны поспехі ў рабоце", - бойка пажадаў адзін з хлопчыкаў.
"Дзякуй. Калі будуць у мяне поспехі ў рабоце, то ў вас таксама будуць", - адказаў на гэта кіраўнік дзяржавы.
Сярод пацыентаў быў і Раман Кагадоўскі. Краіна памятае яго гераічны ўчынак, калі ён некалькі гадоў таму ў час пажару вынес з агню свайго двухгадовага брата. Але потым ужо медыкі гераічна змагаліся за жыццё Ромы.
"Як сябе адчуваеш?" - спытаў Прэзідэнт.
"Нармальна. Цяпер на абследаванне прыйшоў", - адказаў юнак.
Ён рэгулярна праходзіць абследаванні, і ўрачы прызнаюцца, што для іх ён сапраўдны герой.
На памяць Прэзідэнт сфатаграфаваўся з дзецьмі і іх урачамі. Хлопчыкам і дзяўчынкам ён пажадаў папраўляцца і ў далейшым Новы год і іншыя святы адзначаць дома.
версія для друку
зрабіць стартавай
дабавіць у выбранае