Падзеі, факты, анонсы

15 красавіка, Мінск /Кар. БЕЛТА/. Сёння ў Маскве прайшла жараб'ёўка матчу за выхад у Сусветную групу Кубка Федэрацый паміж тэнісісткамі Беларусі і Расіі, які пройдзе 16 і 17 красавіка, паведамляе карэспандэнт БЕЛТА.

Першымі на грунтавы корт малой арэны "Лужнікі" выйдуць беларуска Аляксандра Сасновіч (100-ы нумар сусветнага рэйтынгу) і расіянка Дар'я Касаткіна (32). Пасля іх згуляюць лідар беларускай зборнай пятая ракетка планеты Вікторыя Азаранка і Маргарыта Гаспаран (47). У другі дзень спаборніцтваў 17 красавіка адбудуцца яшчэ два адзіночныя паядынкі: Азаранка - Касаткіна, Сасновіч - Гаспаран, а таксама парная сустрэча, на якую капітан беларусак Эдуард Дуброў заявіў Сасновіч і Вольгу Гаварцову, яго расійская калега Настасся Мыскіна зрабіла стаўку на Алену Весніну (51) і Лізавету Кулічкову (111). Згодна з рэгламентам Кубка Федэрацый капітаны могуць ажыццявіць замены.

І ў суботу, і ў нядзелю першыя гульні пачнуцца ў 14.00 і будуць паказаны ў прамым эфіры тэлеканала "Беларусь 5".

У мінулыя гады беларускія і расійскія тэнісісткі сустракаліся паміж сабой 3 разы. У актыве беларусак дзве перамогі (1995, 1996), расіянкі перамаглі толькі аднойчы (1997). Усе папярэднія матчы праходзілі на розных стадыях спаборніцтваў у першай групе Еўра-Афрыканскай зоны Кубка Федэрацый.

Беларускія тэнісісткі ў гэтым сезоне паспяхова правялі матч другой сусветнай групы Кубка Федэрацый у Квебеку, атрымаўшы перамогу над канадскай камандай з лікам 3:2. Тады выдатна праявіла сябе Аляксандра Сасновіч, якая выйграла два адзіночныя паядынкі і разам з Вольгай Гаварцовай дабілася рашаючай перамогі ў парнай сустрэчы.

Расіянкі пачыналі сезон у чвэрцьфінале элітнага дывізіёна, нечакана ўступіўшы на сваёй арэне камандзе нідэрландаў (1:3). У мінулым годзе расійская каманда дабралася да галоўнага фіналу, дзе прайграла зборнай Чэхіі (2:3).

Зборная Беларусі цяпер займае 12 месца ў жаночым камандным рэйтынгу, каманда Расіі знаходзіцца на 2-й пазіцыі пасля Чэхіі. Беларускі яшчэ ні разу не гулялі ў сусветнай групе, расіянкі чатыры разы выйгравалі Кубак Федэрацый.

Астатнія пары плэй-оф за выхад у Сусветную групу:

Іспанія - Італія,

Румынія - Германія,

Аўстралія - ЗША.

Пераможцы атрымаюць права згуляць у наступным сезоне сярод мацнейшых каманд, а тыя, хто прайграе, застануцца ў другім па рангу дывізіёне.

Таксама 16-17 красавіка адбудуцца паўфінальныя матчы элітнай групы Кубка Федэрацый: Швейцарыя - Чэхія, Францыя - Нідэрланды. Пераможцы паўфіналаў 12-13 лістапада разыграюць галоўны прыз неафіцыйнага чэмпіянату свету сярод жаночых каманд.